Serokê Baroya Amede Abdulkadîr Guleç û Hevserokê OHDa Amedê Mûhîttîn Mûgûç bal kişandin ser binpêkirina mafan yên li Rojava û wiha gotin: “Li ser pergala wekheviyê metirsî hene.”
Li dijî destkeftî û hebûna Kurdên li Rojava êrişên çeteyên HTŞê, DAIŞê û girêdayî Tirkiyeyê didomin. Komên çeteyan dixwazin Kurdan ji herêmên ku tê de dijîn neçarî sirgûnê bikin, mafê jiyanê, mafê xwe birêvebirinê, mafê ewlehiyê ji holê rakin û Kurdan bêstatû bihêlin.
Serokê Baroya Amede Abdulkadîr Guleç û Hevserokê OHDa Amedê Mûhîttîn Mûgûç derbarê êrişên çeteyan û binpêkirina mafên Kurdên li Rojava ji ajansa me re axivîn.
‘Pergala wekheviyê ketiye talûkeyê’
Abdulkadîr Guleç anî ziman ku li Rojava pergaleke li ser bingeha wekhevî ewlehia gelan hatibû avakirin, lê piştî komên cîhadîst ên wekî HTŞê, Colanî hat ser desthilatê ev pergal ket talûkeyê û wiha got: “Piştî rejîm hat avakirin bi Amerîka û dewletên din re têkilî hatin danîn. Lê mixabin, di serê Çileyê de êrîşên li ser Kurdan û baweriyên din dest pê kirin. Bi kuştin û êrîşên hovane, ew pergala Rojava ket talûkeyê. Îro Rojava, Kobanî, Hesekê û bajarên din di bin dorpêçê de ne. Kesên ku duh êrîşî Kurdan, Elewiyan û Durziyan dikirin, îro li Sûriyeyê bûne desthilatdar. Ev metirsiyeke mezin e.”
‘Divê ewlehiya gelan hebe’
Di berdewama axaftina xwe de Abdulkadîr Guleç, bang li Amerîka, Neteweyên Yekbûyî û Koalîsyona Navneteweyî kir û got: “Ewlehî ne tenê ji bo berjewendiyên dewletan, ji bo gelên herêmê jî be. Ew pergala ku hatibû avakirin, divê bi rê û rêbazên demokratîk ve were xurtkirin. Divê ev bi êrîşên hovane ve neyê valakirin.”
Di dawiya axaftina xwe de Abdulkadîr Guleç bal kişand ser geşedanên li Kurdistan û Tirkiyeyê û wiha pêde çû: “Li Tirkiyeyê behsa pêvajoyekê tê kirin. Heke meseleya Kurd bi rêbaza demokratîk bê çareserkirin, divê were zanîn ku gelê Rojava jî xizmên me ne. Pirsgirêkên li wê derê, bandorê li vê derê jî dike. Em aştiyeke bi rûmet dixwazin. Ev ji bo Tirkiyeyê û Sûriyeyê jî pêwîst e. Divê bi hişmendiyê nêzîkî Rojava bibin.”
‘Gelê Kurd şer naxwaze’
Hevserokê OHD’ê Muhîttîn Mûgûç jî ser polîtîkayên navneteweyî yên li dijî Kurdan axivî û wiha got: “Dewletên dagirker bi awayekî hevpar tevdigerin da ku Kurd li cîhanê nebin xwedî nasname û statû. Dîrok nîşan dide ku berxwedan para gelê Kurd e. Îro derfetên Kurdan di qada dîplomasî û têkoşînê de zêdetir in û em bawer in dê bi ser bikevin. Rastiyeke mezin e ku Kurd şer naxwazin. Lê eger şer li wan bê ferzkirin û rêyeke din nemîne, gelê Kurd mecbûr e ku têkoşîna xwe bide.”
‘Mafê mirovan tê binpê kirin’
Muhîttîn Mûgûç da zanîn ku li Rojava mafên mirovan tê binpêkirin û wiha derbirî: “Em wek saziyên hiqûqnas, dibêjin tiştên ku li Rojava diqewimin, binpêkirina mafê mirovan û mafê jiyanê ne. Ev tu carî nayê qebûlkirin. Em wan şermezar dikin û em bawer in ku êrîşên li ser gelê Kurd dê di demeke nêz de, têk biçin.”
