Şaxa Komeleya Mafên Mirovan (IHD) ya Stenbolê ji bo rewşa girtiya nexweş Hatice Onaran ji Parlamentoya Ewropayê re nameyek xand û xwest Hatice Onaran bê berdan.
Şaxa Komeleya Mafên Mirovan (IHD) ya Stenbolê ji bo girtiya nexweş Hatice Onaran ji Parlamentoya Ewropayê re nameyek şand. ÎHDê di nameyê de anî ziman ku Hatice Onaran bi hinceta şandina pereyan ji girtiyan re hatiye girtin, Nûner û rêveberên ÎHDê li ber avahiya xwe ya li Beyoğlu daxuyanî da çapemeniyê. Gelek parêzvanên mafên mirovan û Seroka Şaxa Stenbolê ya IHDê, Jiyan Tosun beşdarî daxuyaniyê bûn. Pankartek bi nivîsa “Hatice Onaran ne bi tenê ye” vekirin û heman dirûşme hate berzkirin. Hevberdevka Komîsyona Girtîgehan a IHDê, Meral Nergis Şahîn name xwend.
Meral Nergis Şahin diyar kir ku Hatice Onaran ji ber ku hevkarî bi girtiyan re kiriye hatiye girtin û wiha got: “Ev hevgirtina mirovî ya ku ji hêla Hatice Onaran ve hatiye nîşandan, li Dadgeha Cezayê Giran a 13’emîn a Stenbolê bi tohmeta ‘Binpêkirina Qanûna Pêşîlêgirtina Fînansekirina Terorê’ bû mijara darizandinê. Di encama darizandinê de, Hatice Onaran 4 sal û 2 meh cezayê girtîgehê lê hat birîn. Ew ji 10’ê Cotmeha 2024’an vir ve li Girtîgeha Girtî ya Jinan a Gebzeyê tê girtin. Biryara mehkûmkirinê ya der barê hevala me Hatice Onaran de li dijî aqil, wijdan û qanûnê ye û sînordarkirinek qanûnî û gefê li ser parêzvaniya mafên mirovan pêk tîne. Ev biryara der barê endama komeleya me Hatice Onaran de ne mînakek tenê ye.”
‘Ji bo girtiyên nexweş têkoşiya’
Meral NergîsŞahîn ku bal kişand ser wê yekê ku di demên dawî de, li dijî xizmên girtiyan doz hatine vekirin bi hinceta ku wan ji bo girtiyan pere şandine, diyar kir ku Hatice Onaran bi salan ji bo mafê jiyanê yê girtiyên nexweş têkoşîn daye û ew bi xwe niha nexweş e. Meral Nergis Şahîn got, “Hatice Onaran kesek 60 salî ye ku rapora wê ya seqetbûnê ji sedî 79 e. Ew ji ber pençeşêra kolonê hatiye dermankirin û muayene û kontrolên wê hîn jî berdewam dikin. Tevî ku ew girtiyek nexweş a giran e jî hîna girtî ye. Hemû hewldanên parêzer û komeleya me ji bo rakirina vê dijqanûniyê heta niha bê encam mane. Em dixwazin ji we re ragihînin ku parêzvana mafên mirovan û endama komeleyê Hatice Onaran hîn jî bi awayekî neqanûnî di girtîgehê de tê girtin.”
Piştî daxuyaniyê, girseya ku kom bû bi dirûşma “Hatice Onaran ne bi tenê ye” ji bo şandina nameyê ji Parlamentoya Ewropayê re çû posteyê.
