Hevberdevkên Yekîtiya Înîsiyatîfa Demokratîk Gulcan Kaçmaz Sayyîgît û Mehmet Kamaç ku bi rojnamegeran re civiyan bal kişandin ser pêvajoya heyî û destnîşan kirin ku divê dewlet jî demildest gavan biavêje.
Însiyatîfa Yekitiya Demokratîk têkildarî xebatên xwe û pêvajoyê li cafeyek navçeya Sûrê ya Amedê bi rojnemevanan re civiya. Hevberdevkên Înîsiyatîfê Gulcan Kaçmaz Sayyîgît û Mehmet Kamaç û endamên înîsiyatîfê û gelek rojnamevan tev li civînê bûn. Di civînê de pankarta “Em ê bi yekitiyê serbikevin” hate daliqandin.
‘Herkes li bendê ye ku dewlet gavan biavêje’
Di civînê de ewilî Hevberdevkê Înîsiyatîfê Mehmet Kamaç axivî. Mehmet Kamaç qala xebatên înîsiyatîfê kirin û da zanîn ku di vê pêvajoyê de xebatên înîsiyatîfê girîng in. Mehmet Kamaç diyar kir ku sedema herî mezin a ku gelê Kurd di sedsalên borî de windakirine pêk neanîna yekitiyê ye û wiha got: “Di sedsala 21emîn de mafê me nîne ku yekitîya xwe ava nekin. Divê kurd di bin sîwana înîsiyatîfê de kom bibin. Pêvajoya ‘Aştî û Civaka Demolratîk’ hêvî daye hemû kurdan. Gavên hatine avêtin yek alî hatine avêtin. Birêz Ocalan roleke dîrokî dilîze. Ne tenê ji bo gelê Kurd ji bo hemû gel û baweriyên Rojhilata Navîn hêviyeke. Em bûn şahidê roja dîrokî ya şewitandina çekan. Herkes li bendê ye ku êdî desthilat û dewlet gavekê biaveje ku ev pêvajo bi serbikeve. Dema serket dê rojên aramî çêbin.”
Êrişên HTŞê şermezar kir
Mehmet Kamaç bal kişand ser êrişên HTŞê yên li dijî civaka Durziyan û wiha domand: “Li Sûriyeyê beriya çend mehan bi hezaran Elewî hatin qetilkirin niha jî bi hezaran Durzî tên qetilkirin. Em van êrîşan şermezar dikin. Em dixwazin hemû gel û bawerî di nava aştiyê de jiyana xwe bidomînin.”
Konferansê diyarî Ehmedê Xanî dikin
Mehmet Kamaç herî dawî da zanîn ku dê di 26-27ê Tîrmehê dê bi dirûşma “Bi armanca yekitiyê ber bi aştiyê ve” li navçeya Bazîd a Agiriyê konferansekê li dar bixin û vê konferansê dê diyarî Ehmedê Xanî bikin. Mehmet Kamaç herkes vexwend konferansê.
‘Ji vir û şunde divê dewlet jî gavên şênber biavejê’
Dû re Hevberdevka Înîsiyatîfê Gulcan Kaçmaz Sayyîgît jî da zanîn ku eleqeya ji bo civînê hêviya wan aştiyê zêde dike. Gulcan Kaçmaz Sayyîgît diyar kir ku Kurdan modeleke ku niha ji cîhanê re bibe mînak derxistin holê û wiha got: “Ji ber wê em niha behsa pêvajoya ‘Aştî û Civaka Demokratîk’ dikin. Birêz Ocalan di sala 93yan de jî behsa vê pêvajoyê dikir. Piştî hêvdîtinên bi birêz Abdullah Ocalan re pêvajo ji hemû cîhanê re hate deklerekirin. Gavên jidil jî hatin avêtin. PKKê agirbest îlan kir, xwe fesixkir û herî dawî jî li Şikefta Caseneyê ya Silêmaniyê çekên xwe şewitandin. Ji vir û şunde divê dewlet jî gavên şênber biavêje. Helbet berpirsyartî ne tenê ya dewletê ye divê hemû beşên civakê yên li Bakûr û Tirkiyeyê berpirsyartiya xwe bi cih bînin. Saziyên sivîl divê bi rêya jêr komîsyonan di wir de cih bigirin û berpirsyartiya xwe bi cih bînin. Divê komîsyon bilez gavan biavêje.”
‘Em her kesî vedixwînin ku tev li înîsiyatîfê bibin’
Gulcan Kaçmaz Sayyîgît axaftina xwe wiha bi dawî kir: “Sedemê windakirina Kurdan a sed salan ew e ku yekitiya xwe pêk neanîne. Em her kesên ku dixwazin tevkariyê li vê pêvajoyê bikin vedixwînin ku tev li înîsiyatîfê bin.”
