Înîsiyatîfa Yekîtiya Demokratîk, Seyîd Riza û hevrêyên wî di salvegera 88emîn de bi bîr anî û xwest demildest cihê gora Seyîd Riza were eşkerekirin.
Îro salvegera 88emîn a darvekirina Seyîd Riza û hevrêyên wî ye. Sazî û dezgehên gelê Kurd bi daxuyanî û çalakiyên cihêreng Seyîd Riza û hevalên wî bi bîr tînin.
Înîsiyatîfa Yekîtiya Demokratîk bi daxuyaniyek nivîskî Seyîd Riza û hevrêyên wî bi bîr anî û destnîşan kir ku divê demildest cihê gora Seyîd Riza were eşkerekirin.
Daxuyaniya Înîsiyatîfê ya bi sernavê “Divê demildest cihê gora Seyîd Riza were eşkerekirin!” bi vî rengî ye:
“Bi dehan salan li ser gelê Dêrsimê zilm û zordariyeke mezin hat meşandin, Kurdên Elewî bi qetlîamên giran re rûbirû man. Li hemberî van polîtîkayan Seyîd Riza û rêhavelên wî pêşangiya gelê Dêrsimê kirin û li dijî êrîşan li ber xwe dan. Lê bi armanca şikandina vîna gel di 15ê Mijdara 1937an de Seyîd Riza, kurê wî û hevrêyên wî li Qada Bugdayê ya Elezîzê hatin darvekirin.
Em ê tu carî ji bîr nekin
Her çiqas di ser darvekirina Seyîd Riza û hevrêyên wî re 88 sal jî derbas bin, ev zilm û zordarî hê jî di hişûbîra gelê Kurd de zindî ye. Lewra ji bo Seyîd Rizayê 75 salî karibin îdam bikin temenê wî biçûktir kirin, temenê kurê wî ku hê 16 salî bû, mezintir kirin. Her wiha daxwaza dawî ya Seyîd Riza jî bi cih neanîn û kurê wî li ber çavên wî darvekirin. Her yek xwedî wijdan vê zilmê ji bîr nake, tu car nade jibîrkirin.
Sembola berxwedanê
Piştî darvekirina Seyîd Riza, mafê definkirin û şînê jî hat binpêkirin. Lewra cenazeyê wî ji malbat û gelê Kurd hat veşartin, heta îro jî cihê gora wî nehatiyê aşkerekirin. Bi van polîtîkayan xwestin ku Seyîd Riza ji bîr û baweriya Dêrsimê derxînin, lê ew heta roja îro, di têkoşîna azadiyê ya gelê Kurd de her tim wek sembola berxwedana li dijî neheqiyê cihê xwe girt.
Eşkerekirina cihê gora Seyîd Riza
Bêguman darvekirina Seyîd Riza û hevrêyên wî rûpeleke ji Komkujiya Dêrsimê ye. Heta komkujiya Dêrsimê neyê ronîkirin, heta bi vê komkujiyê re rûbirûbûnek pêk neyê dê êş û azara gelê Kurd û Elewî jî bi dawî nebe. Bi taybetî, di pêvajoya aştî û civaka demokratîk de rûbirûbûn pêwîst e. Di çarçoveya rûbirûbûnê de divê ji ber komkujiyê bi awayekî fermî lêborîn were xwestin û cihê gora Seyîd Riza demildest were eşkerekirin.
Seyîd Riza li hemberî zordarî û neheqiyê serî netewend, bi wêrekiya xwe ji neyarên xwe re bû kul û derd. Sekna wî ya rûmetdar, di vê demê de jî ji bo yekîtiya neteweyî ya Kurd dibe îlham. Ji ber vê em di 88emîn salvegera darvekirina Seyîd Riza de wî û hemû hevrêyên wî bi rêzdarî û minet bi bîr tînin, li ber têkoşîna wan bejna xwe ditewînin.
