Êlih – Aktîvîstên TJAyê yên Êlihê derbarê meşa xwe ya ku dê di 19ê Nîsanê de li Gemlîkê ji bo azadiya fîzîkî ya Rêberê Gelê Kurd Abdûllah Ocalan pêk bînin wiha bang kirin: “Em bang li hemû jinan dikin ku ew jî tev li çalakiyê bibin û daxwaza azadiya Serokatî bikin.”
Meclisa Jinan a DEM Partiyê û Tevgera Jinên Azad (TJA) dê ji bo azadiya fizîkî ya Rêberê Gelê Kurd Abdûllah Ocalan bi dirûşma “Dem dema azadiya jinan û Rêber Apo ye” di 19ê Nîsanê de ber bi Gemlîkê ve meşekê li dar bixin. Beşek jinan dê ji bajarên bakurê Kurdistanê beşa din jî dê ji bajarên Tirkiyeyê tev li meşê bibin.
Aktîvîstên TJAyê yên Êlihê ku dê di 18 Nîsanê de ji Êlihê ber Gemlîkê ve bi rê bikevin û beşdarî meşê bibin, bang li jinan kirin û daxwaza xwe ya ji bo azadiya fizîkî ya Rêberê Gelê Kurd Abdullah Ocalan anîn ziman.
Gulten Demîr Mûratoglû bal kişand ser pêvajoya aştiyê ya ku zêdetirî saleke hatiye destpêkirin û anî ziman ku ev pêvajo gelekî birûmet û girîng e. Gulten Demîr Mûratoglû derbarê pêvajoyê de wiha bang li jinan kir: “Ev saleke pêvajo hatiye destpêkirin, lê hê jî gaveke wisa şênber nehatiye avêtin. Tişta herî xweş ew e ku saleke cenazeyên ciwanan bi ser dayîk û bavan de nayên. Ji ber wê divê em girîngiyê bidin vê pêvajoyê. Û dema ku jin azad bibe dê civak jî azad be. Lê dîsa jî di her aliyê de barê mezin dikeve ser milê jinan. Bi vê yekê re di 19 Nîsanê de em ê li Gemlîkê ji bo azadiya Serokatî meşekê li dar bixin. Dê ji gelek bajarên Kurdistanê û Tirkiyeyê jin bên tev li çalakiyê bibin. Êdî ne weke berê ye, derfetên me xurttir in. Dema ku em bisekinin dê dewlet nesekine, dema ku em rabin dê dîsa jî dewlet nesekine. Divê em bi têkoşîna xwe dewletê tengezar bikin. Da ku ew jî gavên şênber biavêjin. Em dîsa li pey Serokê xwe ne. Em bang li hemû jinan dikin ku ew roj her kes tev li meşê bibe.”
‘Em dixwazin Serokê xwe di nava xwe de bibînin’
Gulsuma Esen jî bang li hemû jinan kir ku tev li meşa ku wê li Gemlîkê bê lidarxistin bibin û wiha axivî: “Êdî gelê Kurd li benda gav avêtin, wekhevî û çareseriyê ye. Ev saleke ji aliyê Serokatî û Tevgera Kurd ve gelek gavên şênber hatin avêtin. Di vê pêvajoyê de gelek gavên girîng hatin avêtin. Her wiha di nava gelê Kurd de hevgirtinek û yekîtiyek jî hate avakirin. Ger ku milet bigihe xweşiyekê dê hê bi hêztir bibin û dakevin qadan. Di çûyîna me ya Amarê de ya ji bo rojbûna Serokatî gelê Kurd xwe nîşanda. Ew qas milet li wir kom bûn û ew ruh pîroz kirin. Ew qas mirov amade bûn ku ji navenda Xelfetî heta gundê Amarayê bimeşin. Hêviya gelê Kurd a bi Serok gelek mezin e. Herkesî dît ku ev rêxistin dikare pêşengiya vî xelkî bike û gel bigihînin azadiya wî. Em ê ji vir heta Gemlîkê dest bi meşê bikin û em bang li her jinên Kurd dikin ku tev li meşê bibin. Da ku em Serokê xwe azad bikin. Em dixwazin serokê xwe di nava xwe de bibînin. Bijî serok Apo.”
‘Em bang li hemû jinan dikin ku ew jî tev li çalakiyê bibin’
Berdevka TJAyê ya Êlihê Nurten Uzumcu jî anî ziman ku daxwaza jinên ku derketine qadan azadiya fizîkî ya Rêberê Gelê Kurd a Abdûllah Ocalan e û got: “Gelek jinan ji bo Serok azad bibe bang kir û daketin kolanan. Û divê mirov vê yekê baş bibîne. Hewceye ku dewlet jî ji bo aştiyeke mayînde pêk bê gavan biavêje. Divê dewlet vî dengê ku di 8ê Adarê, Newrozê û 4ê Nîsanê de hate derxistin, baş bibîne. Îro gelek jin di nava çalakiyan û xebatan de ne. Niha jî em bi dirûşma ‘Dema Jinê ye’ dest bi tevgereke nû dikin û berê xwe didin Gemlîkê. Dê ev meş ji du aliyan ve dest pê bike. Hem ji aliyê Kurdistanê ve hem jî ji aliyê Tirkiyeyê ve dê meş bêne lidarxistin. Her wiha armanca vê meşê jî heye, di vê meşê de dîsa daxwaza vî gelê ya aştiye çi be dê bê ziman. Heta ku dewlet gavan neavêje em ê li qadan bin û dest ji xebatên xwe bernedin. Ev berpirsyarî hem li ser tevgerê ye hem jî li ser hemû gelê Kurd e. Daxwaza me ew e ku Rêberê Gelê Kurd bi awayekî fizîkî bigihe azadiya xwe û gelê Kurd jî bi wî re bigihe azadiya xwe. Ji ber vê yekê dê jin bi yek dengî azadiyê û aştiyê qîr bikin. Em ê di 18ê mehê de ji Êlihê derkevin û roja 19an jî li Gemlîkê bin. Em bang li hemû jinan dikin ku ew jî tev li çalakiyê bibin û daxwaza azadiya Serokatî bikin.”
