Amed – Înîsiyatîfa Yekîtiya Demokratîk bi boneya 1ê Îlonê Roja Aştiyê ya Cîhanê daxuyaniyek weşand û got: “Banga Aştî û Civaka Demokratîk a birêz Abdûllah Ocalan ji bo hemû gelan deriyê siberojeke aştiyane vekiriye. Banga me li dewlet û hikumetê ye ku ji bo aştiyeke mayînde demildest gavên berbiçav biavêjin.”
Înîsiyatîfa Yekîtiya Demokratîk bi boneya 1ê Îlonê Roja Aştiyê ya Cîhanê bi serenavê “1ê Îlonê li hemû gelên cîhanê pîroz be!” daxuyaniyeke nivîskî weşand.
Înîsiyatîfa Yekîtiya Demokratîk di daxuyaniyê de diyar kir ku ji destpêka mirovahiyê heta îro şerxwazî, zext û zordarî tu car li rûyê erdê kêm nebûne û wiha got: “Herwiha têkoşîna aştiyê jî li hemberî mejiyê şerxwaziyê her tim domiyaye. Ji aliyekî ve bi pevçûn û şeran mirovahi, xweza û çand rastî êrîşan hatiye, ji aliyekî ve jî bi hewldanên lihevhatinê deriyê jiyanê hatiye vekirin. Lê hê jî di hiş û bîra gelek gelan de bandora şer û êrîşên hovane cihê xwe girtiye, hê jî nehatiye jibîrkirin. Lewra şer pirrî caran di destê zaliman de bûye amûrek û li dijî demokrasî û azadiyê hatiye bikaranîn.”
‘Girîngiya aştiyê bi awayekî zelal derket holê’
Înîsiyatîfê di berdewama daxuyaniya xwe de wiha got: “86 sal berê 1ê Îlonê bi êrîşa Naziyan a li dijî Polonyayê şerê 2yemîn ê cîhanê dest pê kir, di nava 6 salan de ji 50 milyonî zêdetir kesan jiyana xwe ji dest dan. Bêguman encama vî şerî ji bo hemû mirovahiyê giran bû, lê di heman demê de girîngiya aştiyê jî bi awayekî zelal derket holê. Lewra bi awayekî trajîk hat tecrubekirin ku di şer û pevçûnê de tenê kuştin, xirabî û xizanî heye; berevajî vê, di aştî û lihevkirinê de jiyan, qencî û pêşketin heye.
Di polîtîkayên şer de tu berjewendiyên gelan nîne
Lê mixabin ku di serî de li Rojhilata Navîn, li her aliyên cîhanê hê jî gengeşî, pevçûn û şer didomin. Heta ku êdî xetereya şerê 3yemîn ê cîhanê tê nîqaşkirin, çekdarbûna dewletan roj bi roj zêdetir dibe. Em dizanin ku di polîtîkayên şer de tu berjewendiyên gelan nîn e. Ji ber vê banga me li hemû gelan e ku li herêm û welatê me dengê aştiyê were bilind kirin. Nemaze di vê pêvojoyê de meşandina têkoşîna yekîtiyê û geşkirina daxwaza aştiyê erkeke girîng û jiyanî ye.”
‘Her gava ji bo aştiyê dê baweriya pêvajoyê jî geştir bike’
Înîsiyatîfê bal kişand ser banga “Aştî û Civaka Demokratîk” a Rêberê Gelê Kurd Abdullah Ocalan û ev tişt got: “Gelên Tirkiyeyê 1ê Îlonê îsal bi pêvajoya Aştî û Civaka Demokratîk pêşwazî dikin. Bêguman hêviya aştiyê, ji bo hemû gelan cihê kêfxweşiyê ye. Lewra Banga Aştî û Civaka Demokratîk a birêz Abdûllah Ocalan ji bo hemû pêkhate, bawerî û gelan deriyê siberojeke aştiyane vekiriye. Banga me li Dewlet û Hikumetê ye ku ji bo aştiyeke mayînde û bi rûmet demildest gavên berbiçav bên avêtin. Lewra bi her gava ji bo aştî û demokrasiye, dê baweriya pêvajoyê jî geştir bike, her gav dê bibe mîsogeriya çareseriya demokratîk.”
‘Em ê hewldana xwe ya ji bo siberojeke aştiyane texsîr nekin’
Înîsiyatîfê daxuyaniya xwe bi van gotinan bi dawî kir: “Herwiha em yekîtî, piştevanî û desthevgirtina gelê xwe jî, wek aştiya gelan stratejik dibînin. Bi vê mebestê, banga me li hemû gel û saziyan e ku bila werin di bin sîwana yekîtiya neteweyî de kom bibin û mil bidin têkoşina aştiyê ya navxweyî. Lewra mifteya aştiyê, yekîtiya me ya neteweyî ye. Em jî di 1ê Îlonê Roja Aştiyê ya Cîhanê de soz û sekna xwe ya ji bo aştî, azadî, edalet, yekîtî û demokrasiyê dubare dikin, careke din binî xêz dikin ku em ê tu car ked û hewla xwe ya ji bo siberojeke aştiyane texsîr nekin. Bi van nêrîn û hêviyan Roja Aştiyê ya Cîhanê li hemû gelan pîroz be!”
