Çapemeniya Îsraîlê li gorî agahiyên ku ji rayedarên Hikûmeta Netenyahû girtin diyar kir ku Sefîrê Amerîkayê yê Enqereyê û Nûnerê Trump ê Sûriyeyê Tom Barrack wekî dijminê Îsraîlê pênase kir.
Sefîrê Amerîkayê yê Enqereyê û Nûnerê Trump ê Sûriyeyê Tom Barrack piştî hatiye wezîfedarkirin her daxuyaniya wî dibe sedema bertekên gelek mezin. Bi taybetî daxuyaniyên Barrack ên li ser pergala dewletên Rojhilata Navîn, federalîzm û netew dewletê dibe sedema nerazîbûnan. Barrack di meha Tebaxê de di daxuyaniyekê de li ser pirsa rojnamegeran bi gotina, “Dest ji terzê heywanî berdin” heqaret li gel kiri bû.
Piştgiriya Barrack a hêzên tundiraw balê dikişîne
Barrack ji ber gotinên xwe yên heqaretê li gel û çandên herêmê dike û wan biçûk dibîne bûbû hedefa rexneyan. Mijarek din a dibe sedema nerazîbûna jî pesindayîna Barrack a rejîmên dîktator a herêmê û piştgiriya wî ya ji bo hêzên tundiraw ên wekî HTŞê ye.
Bi hişmendiya bazirganan tevdigere
Helwesta Barrack a li hemberî gel, çand û baweriyên cuda yên li herêmê ji hêla gelek derdoran ve bi tundî tê rexnekirin û bi hişmendiya oryantalîst û bazirganiyê tê tawanbarkirin. Ne tenê ji Rojhilata Navîn ji Amerîkayê jî gotin û kirinên Barrack wekî encama, “Siyaseta dûrî exlaq a bazirganiyê ya rêveberiye Trump” tê rexnekirin.
‘Monarşî pergala herî baş e’
Ligel ku bertekên heyîn jî Barrack her roj bi daxuyaniyek cuda tê rojevê. Herî dawî di 8ê Kanûnê de li Paytex Dohaya Qatarê tev li Foruma Dohayê bû û heman daxuyanî dan. Barrack îdîa kir ku demokrasî û pergala federalîzmê ji bo gelên Rojhilata Navîn nabe û ev gotinên balkêş kirin: “Tu welatên demokratîk li herêmê nînin. Îsraîl xwe wekî welatekî demokratîk dibîne lê ne demokratîk e. Pergala herî baş monarşî ye û divê Îsraîl jî hewil bide derbasî rêveberiya monarşîk bibe.”
Îsraîl: Barrack wekî sefîrê Tirkan tevdigere
Medyaya Îsraîlê cihek berfireh da daxuyaniyên Barrack. Li gorî nûçeya Walla Newsê rayedarek payebilind ê Îsraîlê daxuyaniyên Barrack bi tundî şermezar kirin. Di nûçeyê de rayedar destnîşan dike ku Serokwezîrê Îsraîlê Benjamîn Netenyahû daxuyaniyên Barrack û helwesta wî wekî, “Dijminiya li hemberî berjewendiyên Îsraîlê” pênase kiriye. Di nûçeyê de tê destnîşankirin ku Netenyahû, Tom Barrack ne wekî sefîrekî li gorî berjewendiyên Tirkiyeyê tevdigere dibîne û vê yekê jî wekî talukeyeke dijberî ewlehiya herêmê dinirxîne.
