Şirnex – Di pêşengtiya TUHAD-Der Botanê de ji Rêberê Gelê Kurd Abdullah Ocalan û girtiyên siyasî re nameyên sersalê hatin şandin.
Li navçeya Cizîrê ya Şirnexê ji aliyê Komeleya TUHAD-Derê ya Botanê ve bi minasebeta sersalê ji Rêberê Gelê Kurd Abdullah Ocalan û girtiyên siyasî re name hatin şandin. Di nav de parlementerên DEM Partiyê yên Şirnexê Newroz Ûysal Aslan û Mehmet Zekî Îrmez, endam û rêveberên partiyên siyasî û saziyên cikava demokratîk gelek welatiyan li pêşiya Postexaneya Cizîrê kom bûn û beriya nameyan bişînin daxuyanî dan.
‘Divê girtiyên nexweş û yên siyasî bên berdan’
Endamê TUHAD-Der Botanê Parêzer Huseyîn Sedat Sulger diyar kir ku ew nameyên dişînin tenê ne ji bo pîrozkirina sersalê dişînin û wiha axivî: “Li gel ku ji aliyê Birêz Ocalan ve pêvajoyek hatiye destpêkirin jî cardin pêkuteyên li ser zindanan didomin. Ev yek nayê qebûlkirin û divê demildest ewil girtiyên nexweş û hemû girtiyên siyasî werin berdan. Em hêvî dikin ku sala nû ji bo hemû hevalên me yên girtî bibe vesileya azadiyê.”
Piştî Huseyîn Sedat Sulger, parlementer Newroz Ûysal Aslan û Mehmet Zekî Îrmez jî axivin. Parlamenteran xwestin sala nû ji bo Rêberê Gelê Kurd Abdullah Ocalan û hemû girtiyên siyasî bibe sala azadiyê.
Piştî axaftinan nameyên ku hatibûn nivîsandin ji Rêberê Gelê Kurd Abdullah Ocalan û girtiyên siyasî yên li girtîgehên cuda tên ragirtin re hatin şandin.
