Nûnerên Platforma Saziyên Demokratîk ên Amedê banga tevlibûna meşa 9ê Cotmehê ya Amedê kirin û wiha gotin: “Werin em bi hevre civakek azad û demokratîk ava bikin.”
Rêberê Gelê Kurd Abdullah Ocalan di 9ê Cotmeha 1998an de ji Sûriyeyê hate derxistin. Tevgera Azadiya Kurdistanê 9ê Cotmehê wek destpêka komploya navneteweyî ya li dijî Abdullah Ocalan pênase dike. Tevî ku daxwaz, lêgerîn û armanca Abdullah Ocalan çareseriya demokratîk a pirsgirêka Kurd bû jî lê bi hevkariya hêzên hegomon hate girtin. Abdullah Ocalan di 15ê Sibata 1999an de li Kenyayê ji aliyê hêzên hegomon ên navneteweyî ve hate dîlgirtin û heman rojê wî anîn radestî Tirkiyeyê kirin.
Abdullah Ocalan ev 27 sal in li Girtîgeha Girava Îmraliyê di bin tecrîdeke giran de tê girtin. Tevî ku pêvajoya Aştî û Civaka Demokratîk da destpêkirin jî lê sîstema tecrîdê ya li Îmraliyê didome. Platforma Saziyên Demokratîk ên Amedê ji bo komploya navneteweyî şermezar bikin û daxwaza azadiya fizîkî ya Rêberê Gelê Kurd Abdullah Ocalan bikin dê 9ê Cotmehê bi diruşma “Bi Rêbertiya Azad Ber Bi Civaka Azad Ve” li Qada Şêx Seîd meşekê li dar bixin. Meş dê heta Rawestgeha Balikçilarbaşi berdewam bike.
Hevserokê Partiya Heremên Demokratîk (DBP) ya Amedê Ahmet Dogan û Hevseroka DEM Partiyê ya Amedê Gulşen Ozer têkildarî meşa li dijî komployê axivîn û gelê Amedê vexwendin meşê.
‘Paradîgma Rêberê Gelê Kurd çareserî ye’
Ahmet Dogan bal kişand ser komploya 9ê Cotmeha 1998an û meşa azadiyê ku dê li dar bixin û wiha got: “ Di 9ê Cotmehê de komployêkî navneteweyî li ser Rêberê Gelê Kurd Abdullah Ocalan hat meşandin. Ev bûyerên îro li Rojhialata Navîn diqewimin bi vê komployê ve girêdayî ne. Rêberê Gelê Kurd ji bo avakirina aştiya li Rojhilata Navîn li gorî netew dewletan wek astengî dihate pênasekirin. Ji ber vê yekê netew dewletan bi hêzên hegemonîk re komployek pir dijwar pêk anîn û Rêberê Gelê Kurd dîl girtin. Rêberê Gelê Kurd ev 27 sal in têkoşîna xwe li Girava Îmraliyê dide meşandin. Di şexsê Rêberê Gelê Kurd de, gelê Kurd jî hatiye dîlgirtin. Bi vê komployê re maf, çand û zimanê gelê Kurd hatiye pinpêkirin. Em dibînin ku di Rojhilata Navîn de bê felsefe û paradîgma Rêberê Gelê Kurd çareserî ne pêkan e. Paradîgmaya Rêberê Gelê Kurd a xeta sêyemîn îro li Rojava encam girtiye. Ji gelan re bûye hêvî û ji bo hemû dewletan jî xelasî ye. Ji ber vê yekê di 9ê Cotmehê em ê ji bo Rêbertî û civaka azad meşa azadiyê li dar bixin û vê komployê şermezar bikin. Em hemû gelê xwe vedixwînin vê meşê.”
‘Armanca vê bangê avakirina civakek demokratîk e’
Gulşen Ozer jî ji bo azadiya Rêberê Gelê Kurd Abdullah Ocalan û avakirina civakek azad pêk were wiha got: “Birêz Abdullah Ocalan di 27ê Sibatê de bi banga Aştî û Civaka Demokratîk şerê 52 sal in didome xwest biqede. Dixwaze rêya siyaseta demokratîk were vekirin. Armanca vê bangê avakirina civakek demokratîk e. Lê heya niha em dibînin ku ji aliyê dewletê ve tu gav nehatine avêtin. Ji ber vê yekê em gelê xwe vedixwînin meşa azadiyê. Em dibêjin werin em bi hev re civakek azad û demokratîk ava bikin û vê komploya navneteweyî şermezar bikin.”
