Mêrdîn – Malbatê ji bo şervanê HSDê Abdullah Akyuz ku di 13ê Kanûna 2024an li Bendava Tişrînê ya Bakur û Rojhilatê Sûriyeyê jiyana xwe ji dest dabû, li navçeya Nisêbînê ya Mêrdînê şîn danîn.
Navenda Ragihandinê ya Hêzên Sûriyeya Demokratîk (HSD) bi daxuyaniyekê ragihand ku 4 şervanên wan di dîrokên cuda de li herêmên cuda yên Bakur û Rojhilatê Sûriyeyê di şerê li dijî dewleta Tirk û komên paramîlîter ên girêdayî wê de jiyana xwe ji dest dane. HSDê ragihand ku şervanê wan Abdullah Akyuz (Çekdar Artêş) di 13ê Kanûna 2024an de li Bendava Tişrînê, Abdûllah Kaya (Kemal Erûh) di 9ê Kanûna 2024an de li Sirînê, Mihemed Hiso (Mihemed) di 8ê Kanûna 2024an de li gundê Kabirca yê Minbicê û Yûsif Hemadî Xelîfe (Zindan) jî di 14ê Kanûna 2024an de li Minbicê jiyana xwe ji dest dane.
‘Em ê di rêya wan de israr bikin’
Navenda Ragihandinê ya HSDê têkildarî mijarê daxuyanî da û got: “Em bi serbilindahî û serfirazî radigihînin ku hevrêyên me Çekdar Artêş (Abdullah Akyuz), Kemal Eruh (Abdullah Kaya), Mihemed Hiso (Mihemed Îbrahîm Hiso) û Zindan (Yûsif Hemadî Xelîfe) di berxwedana li hember êrişên dewleta Tirk a dagirker û çeteyên wê yên li ser herêmê me de şehîd bûne. Bila serê malbatên her çar şehîdan û tevahiya malbatên şehîdên me sax be. Îro israra me ya domandina rêya wan û parastina hêviyên wan û pêkanîna armancên wan zêdetir dibe.”
Şîn dê sê rojan berdewam bike
Piştî ragihandina HSDê malbata şervanê HSDê Abdullah Akyuz li Mala Şînê ya Taxa Girnevas a Nisêbînê şîn danî. Endam û rêveberên Komeleya Yekitî Çand Piştevanî û Alikariya bi Kesên Xizmên Xwe li Dergûşa Şaristaniyê Winda Kirine re (MEBYA-DER) û gelek kesan serdana şîna Abdullah Akyuz kirin. Şîn wê sê rojan berdewam bike.
