Li Amedê bi pêşengiya Platforma Saziyên Demokratîk bi boenya 1ê Sibatê Roja Piştevaniya bi Rojava re ya Cîhanê bi deh hezaran kes meşiyan. Piştî meşê Hevserokê DEM Partiyê Tuncer Bakirhan axivî û got: “Êriş kirin lê berxwedana Kurdan ji bîr kirin. Hûn nikarin bi milyonan Kurd bêstatu bihêlin. Divê hikûmet li gorî peymanê tevbigere.”
Bi pêşengiya Platforma Saziyên Demokratîk li Amedê meşa 1ê Sibatê Roja Piştevaniya bi Rojava re ya Cîhanê hate lidarxistin. Hevserokê Giştî yê DEM Partiyê Tuncer Bakirhan, serok û nûnerên partiyên siyasî, nûnerên rêxistinên sivîl, ciwanên enternasyonalîs, hevşaredarên Amedê, Dayikên Aştiyê, aktîvîstên TJAyê û bi deh hezaran kes tev li meşê bûn.
Meşê ji ber Bîrdariya Mafên Jiyanê ya li Parka Koşuyolû dest pê kir. Di meşê de girseyê bênavber dirûşmeyên “Bijî Serok Apo”, ”Yek e yek e gelê Kurd yek e”, “Şehîd namirin”, “Bijî berxwedana Rojava” û “Rojava Rojhilat e Kurdistan yek welat e” hatin berzkirin. Pankartên “Xwedîderketina li Rojava, xwedîderketina li mirovahiyê ye”, “Em bi ruhê yekîtiya neteweyî ya demokratîk 1ê Sibatê Roja Piştgiriya Rojava ya Cîhanî silav dikin” hatin vekirin. Di meşê de dowîzên, “Berxwedan bi honandina keziyên jinan dest pê dike”, “Her keziyek hêvî û azadiyê dihewîne” û gelek dowîzên din hatin rakirin.
Meşa bi heybet li ber AZC Plazayê ya li Semta Ofîsê bi dawî bû. Piştî meşê axaftin hatin kirin.
‘Kurdistan li pişta Rojava ye’
Hevserokê Giştî yê DEM Partiyê Tuncer Bakirhan li vir axivî û diyar kir ku beriya 15 salan, di rojeke wekî îro de, pêleke tarî ya zilmê destpêkê Rojhilata Navîn û piştre cîhan girtibû bin bandora xwe û wiha got: “Li Sûriyeyê, li Rojava; jinên Kurd, şoreşger ew tariya ku cîhan li ber wê teslîm bûbû bi têkoşîna xwe, bi berdêla can û xwîna xwe bi dawî kirin. Rojava azad kirin. Cîhan ji belaya tarî ya DAIŞê rizgar kirin. Vaye ew şoreş, ew şoreşa jinan, ew şoreşa berxwedanê, ew şoreşa Rojava îro xwe berz kir. Xwestin ku li Helebê bidine tepisandin lê nikaribûn. Li Şêxmeqsûd û Eşrefiyeyê çete, hêzên rejîmê û hêzên paramîlîter xwestin wê şoreşa Rojava ya ku cîhanê rêz jê re girtibû û îlan kiribû, ji holê rakin. Lê tiştek ji bîr kirin: Duhok, Zaxo, Silêmanî, Wan, Amed, Sêrt, Qers û Îzmîr… li pişta Rojava bû. Berxwedan û piştevaniya gelan û Kurdan ji bîr kirin. Hûn ji vê saetê şûn ve nikarin bi milyonan gelê Kurd bêstatu bihêlin.”
‘Peymana 30yê Çileyê qezencê dide her kesî’
Tuncer Bakirhan di berdewama axaftina xwe de destnîşan kir ku heke rejîma Sûriyeyê li gorî peymana 30yê Çileyê tevbigere û vê yekê li ser zemîneke rast pêk bîne; destpêkê Sûriye û piştre Rojhilata Navîn qezenc dike û got: “Tirkiye qezenc dike, em hemû qezenc dikin. Gavên demokratîk ên li wir, pêşketina pêvajoya li vir jî mîsoger dike.”
‘Berxwedana Rojava li her derê cîhanê belav bû’
Aktîvîsta TJAyê Çaglar Demîrel jî anî ziman ku Şoreşa Rojava, şoreşa jinan e û got: “Ev şoreş li Kurdistanê, li cîhanê belav bû. Ev şoreş ji cîhanê re bû mînak. Hûn dizanin ku ev berxwedan li Rojava bi salan e berdewam e. Rojava xeta sor e. Xeta sor a gelê Kurd e. Rojava xeta sor a jinan e. Ji ber ku hûn zanin, ev çeteyên DAIŞê berî her tiştî li Rojava, li gelê me, dijminahiya jinê dikirin. Ji bo êrîşî jinê dikirin, em vêya tu carî qebûl nakin. Em ê têkoşîn û berxwedana xwe li Rojava û li her derê cîhanê belav bikin. Çeteyên DAÎŞ’ê destavêtin rûmeta jinê. Lê jinên Rojava, ne tenê parastina jinên Rojava kirin, li cîhanê belav bûn, parastina jinan, berxwedan û têkoşîna jinan li cîhanê belav kirin. Ji bo vê yekê, ev têkoşîn wê berdewam bike. Em ê her û her Rojava biparêzin. Yekîtiya Kurdan li Rojava dest pê kir.”
‘Roj roja yekîtiyê ye’
Hevberdevkê Înîsiyatîfa Yekîtiya Demokratîk û Parlamenterê DEM Partiyê yê Amedê Mehmet Kamaç jî axivî û wiha got: “Careke din dibêjim, em li ser navê Înîsiyatîfa Yekîtiya Demokratîk di van rojên dîrokî de, li her çar parçeyên Kurdistanê û li dîasporayê em bang li hemû Kurd û Kurdistaniyan û dostên Kurdan dikin; em dibêjin; roj, roja yekîtiyê ye; roj roja xîretê ye; roj roja berxwedanê ye. Bila hemû partî û rêxistinên me, bila hemû dezgehên me, li ser vê xetê werin ba hev. Bila her kes bi rengê partî û rêxistina xwe, em tifaqeke neteweyî, tifaqa Kurdistanî ava bikin. Me dît ku rêya Kurdan yek e û ruhê wan yekîtî ye, ya din jî berxwedana Kurd û Kurdistanê ye.”
