Komîsyona Meclîsê derbarê serdana Girava Îmraliyê ya hevdîtina bi Rêberê Gelê Kurd Abdullah Ocalan re daxuyanî da. Di daxuyaniyê de hat gotin ku hevdîtin ji bo pêkhatina xwişk-biratiyê erênî bûye.
Komîsyona Demokrasî, Xwişk-Biratî û Hevgirtina Millî ku ji Serokwekîla Koma Meclîsê û endama komîsyonê ya DEM Partî Gulistan Kiliç Koçyigit, Cîgirê Serokê Giştî yê MHPê Fetî Yildiz û ji AKPê Huseyîn Yayman cih digirt îro li Girava Îmraliyê bi Rêberê Gelê Kurd Abdullah Ocalan re hevdîtin pêkanîn. Komîsyonê derbarê hevdîtinê de daxuyaniyeke nivîskî parve kir.
Daxuyaniya nivîskî ya komîsyonê wiha ye: “Komîsyonê heta niha 17ê civînên guhdarkirinê pêkanî. Herî dawî jî di civîna 18an de komîsyonê biryar girt ku şandeyek biçê Girava Îmraliyê û bi Abdullah Ocalan re hevdîtin pêkbîne. Li ser vê biryarê şandeyek çû Girava Îmraliyê. Heyeta komîsyonê li ser banga Aştî û Civaka Demokratîk a Abdullah Ocalan û piştî wê bangê biryara fesîhê û berdana çekan a rêxistinê û mutabakata 10ê Adarê pirs ji Abdullah Ocalan pirsin û bersivên berfireh girtin. Di encama civînê de ji bo hevgirtina civakî, pêkhatina xwişk-biratiyê û bi awayekî pozîtîf rêveçûna pêvajoyê encameke erênî bû. Komîsyon niha şûn ve jî ji bo armancên xwe pêkbîne wê helwesta xwe ya biryardar bidomîne.”
