Parlamenterê DEM Partiyê Berdan Ozturk li Licê têkildarî îstîsmarkirina gelek zarokan daxuyanî da û got: “Bila dewlet destên xwe yên qirêj ji ser zarokên me bikişîne. Divê gelê me bi her awayî li dijî van polîtîkayan xwedî li zarokên xwe û çand û zimanê xwe derkeve.”
Hat zanîn ku kesê bi navê A.Ç. yê li Taxa Karahasan a navçeya Licê ya Amedê dikandar bû, îstîsmara zayendî li gelek zarokan kiriye. Nû derket holê ku bûyerek wiha pêk hatiye. Hat diyarkirin ku A.Ç. yê îstîsmar li zarokan kiriye, di 2yê Çileyê hatiye binçavkirin û girtin.
Rêxistinên DEM Partî, Partiya Heremên Demokratîk (DBP) yên Amedê li ber avahiya DEM Partiyê ya Navçeya Licê daxuyanî dan û nerazîbûn nîşanî îstîsmarkirina zarokan dan. Parlamenterê DEM Partiyê yê Amedê Berdan Ozturk û gelek kes tev li daxuyaniyê bûn.
Hevseroka DEM Partiya Amedê Gulşen Ozer ewilî axivî û diyar kir ku pergal bi polîtîkayên xwe yên qirêj dixwaze di nava Kurdan de bê baweriyê çêbike û got: “Zarokên me bi van polîtîkayên qirêj re rû bi rû man e. Bila destên xwe yên qirêj ji ser zarokên me bikişînin. Zarokên me siberoja me ne. Em naxwazin zarokên me ku siberoja me ne, bi van polîtîkayên qirêj û bê exlaq mezin bibin.”
‘Divê em rê nedin polîtîkayên qirêj’
Piştre Parlamenter Berdan Ozturk jî axivî û da zanîn ku li dijî dewleta yekperest ji bo hebûna xwe sed sal in têkoşînek dîrokî didin meşandin û wiha got: “Licê ji dîrokê ve heya niha li dijî dagirkeriyê tu carî serî netewandiye û li ber xwe daye. Dîroka Licê dîroka berxwedanê ye. Dewlet sed sal in nikare çand û zimanê Kurdan tune bike. Lê belê di deh salên dawî de li Kurdistanê bi şerê taybet bi ser zarok û ciwanên me ve tên. Tîryakê, fuhuş, tacîz bi destê dewletê tê kirin. Em li vir dibêjin; têkoşîna me ji bo siberojeke ronî ye. Ciwan û zarokên me siberoja me ne. Bila dewlet destê xwe ye qirêj ji ser zarokên me bikişîne. Gelê me çawa xwedî li ziman û çanda xwe derdikeve divê li dijî van polîtîkayên qirêj jî rabe û xwedî li zarokên xwe derve.”
