Bi sedan kes li Mûşê li hev civiyan û êrişên li ser Rêveberiya Xweser a Rojava şermezar kirin.
Platforma Saziyên Demokratîk a Muşê li dijî êrişên li ser Rojava meşiya û daxuyanî da. Gelek welatî li ber Kolana Îstasyonê kom bûn û bi çepik û dirûşmeyan dest bi meşê kirin. Pankartek bi nivîsa “Rojava wîjdan e, azadî ye, berxwedan e, kes nikare teslîm bigire” hate vekirin. Bi sedan kes meşiyan û dirûşmeyên wekî “Rojava rûmeta gelê Kurd e” û “YPG gel e, gel li vir e” qîr kirin.
Di tevahiya meşê de, welatiyên li derdorê bi nîşanên serkeftinê û çepikan piştgiriya xwe nîşan dan. Nûnerên partiyên siyasî û saziyên demokratîk ên bajêr û gelek welatî beşdarî meşê bûn.
Girseya ku li Xaçerêya Îstasyonê kom bû, daxuyanî da. Hevseroka Partiya Wekhevî û Demokrasiyê ya Gelan (DEM Partî) ya Mûşê Çîçek Tûtûş daxuyanî da û diyar kir ku êrîşên li ser Rojava aştiya tevahî herêmî tehdît dikin û xwest ku ev êriş tavilê werin rawestandin.
Çîçek Tûtûş diyar kir ku divê hemû dewletên herêmî, bi taybetî yên ku berpirsiyariya ji nû ve avakirina Sûriyeyê girtine ser xwe, beşdarî pêkanîna aştiyê ya di navbera Kurd û Ereban de, û di navbera gel û baweriyên cuda yên li Sûriyeyê de bibin. Divê Tirkiye bibe aktorek ku aliyan li hev bîne, ne ku sor bike. Em daxwaza rakirina dorpêça li ser Şêx Meqsûd û Eşrefiyê li Helebê, rawestandina tavilê ya êrîşan li ser herêmên Dêr Hafîr, Bendava Tişrîn, Tebqa, Reqa û Dêra Zorê dikin û ji nû ve destpêkirina diyalogê û rêya çareseriyek destûrî dikin. Parastina aştiyê li Sûriyeyê di heman demê de parastina wekhevî û pêşeroja hevpar a gelên Rojhilata Navîn e. Em bi eşkereyî dibêjin ku em ê li ser vê xetê israr bikin.”
‘Em ê parastina aştî û azadiyê bidomînin’
Parlamentera Mûşê Sumeyye Boz jî destnîşan kir ku bi êrişên li ser Rojava li dijî gelê Kurd û kesên têkoşîna demokrasiyê didin jî êriş hatine destpêkirin û da zanîn ku ew dê li dijî van êrişan parastina aştî û azadiyê berdewam bikin.
Çalakî bi çepik û dirûşman bi dawî bû.
