Fermandarê Giştî yê GSDê Mazlûm Ebdî, Hevserokên DEM Partiyê Tulay Hatîmogullari û Serokê YNKê peyamên sersaxiyê ji bo endamê Desteya Serokatiyê ya Partiya Yekîtiya Demokratîk (PYD) Salih Muslim weşandin.
Fermandarê Giştî yê Hêzên Sûriya Demokatîk (HSD) Mazlûm Ebdî der barê şehadeta ji pêşengên siyasî yên Şoreşa Rojava û siyasetmedarê Kurd endamê Desteya Serokatiyê ya Partiya Yekîtiya Demokratîk (PYD) Salih Muslim de peyamek li ser hesabê xwe yê Xê de parve kir.
Mazlûm Ebdî di peyama xwe de got: “Me bi dilêşî û xemgîniyeke mezin agahiya koça dawî ya Endamê Desteya Hevserokatiya PYD’ê Salih Mulsim bihîst. Bavê Welat, bavê şehîdekî, dosekî nêzî, pêşengekî mezin, siyasetmendar û welatparêzekî Kurd ê hêja bû. Bavê Welat di 40 salên borî de rolekî mezin di têkoşîna azadiya gelê Kurd de list û gelek caran ji aliyê Baasê ve hate girtin û sûrgûnkirin. Her wiha Bavê Welat di şoreşa Rojavayê Kurdistanê de rolekî pêşeng leyîst. Emê şopa şehîdê doza gelê Kurd Bavê Welat bidomîn,heta hêviyên wî bi cih bînin. Serê malbatê, PYD û yê gelê Kurd sax be.”
Peyama Hevserokên DEM Partiyê
Hevserokên Giştî yên Partiya Wekhevî û Demokrasiyê ya Gelan (DEM Partî) Tulay Hatîmogullari û Tuncer Bakirhan ji bo endamê Desteya Hevserokatiyê PYDê Salih Muslim ê ku jiyana xwe ji dest da peyama sersaxiyê weşandin. Di peyamê de wiha hate gotin: “Em ji ber wefata rêzdar Salih Muslim pir xemgîn in. Em careke din xemgîniya xwe diyar dikin; em sersaxî û duayên xwe bi taybetî ji bo heval û hevjîna wî Eyşe Efendî, gelê Kurd, gelên Rojava û Sûriyeyê pêşkêş dikin.”
Peyama Bafil Talabanî
Serokê Yekîtiya Nîştimanî ya Kurdistan (YNK) Bafil Talebanî bi boneya şehadeta siyasetmedarê Kurd û hevserokê berê yê PYD’ê Salih Muslim peyama sersaxiyê weşand û got, “Ez ji ber koça dawî ya Endamê Hevserokatiya Partiya Yekîtiya Demokratîk (PYD) Birêz Salih Muslim pir xemgînim. Ez sersaxiyê ji gelê Rojavayê Kurdistanê, hevalên PYD’yî û xizmên serbilind yên Birez Salih Muslim re dixwazim. Birêz Salih Muslim, wekî yek ji serkirdeyên navdar yên Rojavayê Kurdistanê, di mijarên netewî de roleke girîng leyîst û têkiliya wî ya xurt bi YNK re ji bo parastina mafên gelê me faktoreke bihêz bû di yekîtiya me de. Bila giyanê hevalê nemir Salih Muslim heta hetayê di aştiyê de bimîne. Bila Xwedê aramî û teselîyê bide her kesî.”
