Amed – Nivîskar Nesrîn Akgul bi pirtûka xwe ya “Di Dîroka Baweriyan de Elewîtî” derket pêşberî xwînerên xwe. Pirtûka Nesrîn Akgul ji weşanxaneya Jingehê derçû.
Pirtûka bi navê “Di Dîroka Baweriyan de Elewîtî” ( İnançlar Tarihinde Alevilik) a Nesrîn Akgulê ji Weşanxaneya Jingehê derket pêşberî xwînerên xwe. Nivîskar Haydar Ergul di pêşgotina pirtûkê de diyar dike ku nivîskar Nesrîn Akgul piraniya pirtûka xwe li girtîgehê nivîsandiye û li girtîgehê ketiye pey şopa dîroka baweriya elewîtiyê. Haydar Ergul, di nirxandinê de balê dikişine ser nêzîkatiya dewletê ya li dijî elewîtiye û destnişa dike ku dewlet elewîtiyê wekî şîroveyeke îslamiyetê nîşan dide û derdixe pêş û statuya cemxaneyan qebûl nake. Haydar Ergul, diyar dike ku dewlet ewelîtiyê wekî baweriyeke ku ji Asyaya Navîn hatiye nîşan dide û dixwaze hemû elewiyan wekî tirk bide xuyakirin.
Nivîskar Nesrîn Akgul ev pirtûka xwe di girtîgehê de nivîsandiye. Nivîskar di vê xebata xwe de hewl dide ku serpêhatî, çand û baweriya Rêya Heq a ku dibêje: “Dema ku hêj erd û esman tunebû ez hebûm” nîşanê xwinera bide. Nivîskar Nesrîn Akgul di pirtûka xwe de aliyên hevpar û cuda yên baweriyên wek Êzdiyatî, Yaresanî, Rêya Heq(Elewîtî) yên çanda Aryenî dide ber hev û agahiyên berfireh parvedike. Polîtîkayên zext û zordariyê, bişaftinê yên desthalatdaran li ser van baweriyên qedîm aşkere dike.
Nivîskar Nesrîn Akgul bi vê pirtûkê dixwaze nêzîkatiyên desthilatê yên şaş û rastiya baweriya elewîtiyê nîşanî xwînerên xwe bide.
