Jinên Kurd li dijî êrîşên Tirkiyeye û çeteyên xwe dispêrin wê, bang li NYê kirin û xwestin li dijî sûcên şer û mirovahiyê demildest tedbîran bigirin.
Çalakiya rûniştinê ya ku her roja Çarşemê li ber Nûnertiya Neteweyên Yekbûyî (NY) ya li bajarê Cenevre yê Swîsreyê tê lidarxistin, vê hefteyê endamên Yekîtiya Jinên Kurd a Swîsreyê (YJK-S) birêve birin. Çalakî ji bo bîranîna şehîdên şoreşa Rojava bi deqîqeyek rêzgirtinê destpê kir. Di çalakiyê de êrîşên Tirkiyeyê û çeteyên ku xwe dispêrin wê yên li ser Bakur û Rojhilatê Sûriyeyê protestokirin. Berdevka YJK-Sê Selma Surer di çalakiyê de mafê axaftinê girt û bal kişand ser hevdîtinên ku di çarçoveya Hefteya Mafên Mirovan de li NYê dewam dike. Surer anî ziman ku dema jin û zarokên Kurd di bin êrîşên çeteyên bi piştgiriya Tirkiyeyê de ne, cîhan li hemberî vê bêdeng e û got: “Em ji vir bang dikin, jinên Kurd ku şer dikin û bedena xwe sîper dikin ne bi tenê ne. Çima dema mijar dibe gelê Kurd û Rojhilata Navîn hûn bêdeng in?”
Li ser navê Jinan Antina Martin daxuyanî xwend û bi Fransî xwend, bang li civaka navneteweyî bi taybet NYê kir ku ji bo Sûriyeya demokratîk xweseriya Bakur û Rojhilatê Suriyeyê nas bikin.
Sekreterê Partiya Sosyalîstên Swîsreyê (SP) Halîma Delimi jî berxwedana Rojava silav kir û piştevaniyê da. Li ser navê Tora Serhildan a Enternasyonalîstan Anne Cloud jî diyar kir ku ew ê bi her şertê Şoreşa Rojava biparêzin.
Hevseroka Konseya Kurd a Demokratîk Dîlan Çetînkaya mafê axaftinê girt. Çetînkaya berxwedana jinên Rojava silav kir û got: “Dixwazin careke din gelê Rojava rûbirûyê komkujiyan re bihêlin. Di van êrîşan de Şoreşa Jinê ya Rojava hedef hatiye girtin. Erka bingehîn a NYê ye ku li dijî êrîşan demildest bi rêya guftûgoyê çareseriyê bibîne. Em ê weke jinên Kurd tu carî dev ji Şoreşa Rojava neberdin.”
Çalakiya jinan bi dirûşmeyan bi dawî bû.
