Meclîsa Jinan a DEM Partiyê ya Wanê bi boneya 25ê Mijdarê Roja Têkoşîna Li Dijî Tûndiya Li Ser Jinan zincîra mirovan pêk anî û da zanîn ku ew dê erka xwe ya pêşengtiyê bi têkoşîna “Aştî û Civaka Demokratîk” bidomînin.
Meclîsa Jinan a Partiya Wekhevî û Demokrasiyê ya Gelan (DEM Partî) ya Wanê, bi boneya 25ê Mijdarê Roja Têkoşîna Li Dijî Tûndiya Li Ser Jinan bi dirûşmeya “Li dijî tundiyê, ji bo azadiyê û wekheviyê em bi hev re ne” li Qada Bajêr a Wanê daxuyanî da û zincîra mirovan pêk anî. Di daxuyanî de pankarta “Ji bo azadî û wekheviyê em bi hev re ne” hat vekirin û dirûşmeyên “jin jiyan azadî” û “bijî berxwedana jinan” hatin berzkirin. Parlementera DEM Partiyê ya Wanê Gulderen Varli, hevseroka DEM Partiyê ya Wanê Gulşen Kûrt, Dayikên Aştiyê, rêveberên DBPê yê navçe û navendê, nûnerên saziyên sivîl û gelek jin tev li bûn.
‘Em ê li dijî tundiyê têkoşîna xwe mezintir bikin’
Hevseroka DEM Partiyê Gulşen Kûrtê di daxuyaniyê de axivî û bal kişand ser dîroka 25ê Mijdarê. Gulşen Kûrtê anî ziman ku ew weke jin bi salan e li dijî polîtîkayên dewletê yên mêrserwer têdikoşin û diyar kir ku ew têkoşîna xwîşkên Mîrabal silav dikin. Gulşen Kûrt destnîşan kir ku ew her serê sibê bi kuştina jinan, mirinên bigûman ji xew hişyar dibin û got: “Em dizanin ku ev mirinên bigûman ên jinan ne munferîd in û polîtîk in. Necezakirina sîstematîk a kuştinên jinan encama hişmendiya mêrserwer e. En di nava jiyanekê de ne ku her roj feqîrî û tûndiya li ser jinê zêde dibe. Em weke jin dê li dijî tûndiyê têkoşîna xwe mezintir bikin û em dê erka xwe ya pêşengtiyê ya di banga ‘Aştî û Civaka Demokratîk’ de bidomînin. Em dizanin ku dema ev pêvajo bi ser ket, dê jin jî azad bibe.”
Piştî axaftinê jinan li ser rêya Cûmhûriyetê zincîra mirovan çêkir û dirûşmeyên “Jin jiyan azadî”, “Rojîn Kabaîş sedema serhildana me ye”, “Bijî berxwedana jinan” berz kir.
