Karker Baran Temîzaltin ê di şirketa ‘MY Grup’ê de dixebitî, ji ber ku bi hevalekî xwe re bi Kurdî axivî, di servîsa şirketê de rastî êrişa ajokar û karkera xwaringeha şîrketê hat û pişt re jî ji kar hate avêtin.
Karker Baran Temîzaltin, li Tekîrdagê girêdayê şîrketa “Argon a Pîşesazî û Bazirganî Şîrketa Anonîm” a girêdayî “MY Grup” ê de dixebitî. Lê di 6ê Îlonê de dema bi hevalekî xwe re bi Kurdî axiviye rastî êrişê hatiye û di 8ê îlonê de ji kar hatiye avêtin. Baran Temîzaltin û Aktivîstê Zimanê Kurdî Cevdet Zîlanli di derheqê êrişê de ji Ajansa Welat (AW) re axivîn.
‘Hûn nikarin Kurdî biaxivin’
Karker Baran Temîzaltin diyar kir ku dema ji kar derketiye bi servîsa şirketê vedigeriya malê û di servîsê de bi hevalekî xwe re Kurdî axiviye ji ber vê rastî êrişê hatiye û got: “Ajokarê xizmetê got ‘yên Kurdî diaxivin bila servîsa li min siwar nebin. Hûn nikarin bi Kurdî biaxivin’. Ji ber vê êrişê ez pir aciz bûm. Ez ji kar jî derxistin, gelekî xemgîn bûm.”
‘Divê ku êdî ev êrişên nijadperest pêk neyên’
Baran Temîzaltin da zanîn ku êriş liser ziman nayên qebûlkirin û axaftina xwe wiha domand: “Vê bûyerê em pir acizkirin. Ji xwe me roja 12ê Îlonê li Çerkezkoyê li ber şaredariyê daxuyaniya çapemeniyê da. Ez dixwazim ku ew mijar baş bê fêmkirin.”
‘Em şermezar dikin’
Aktivîstê Zimanê Kurdî Cevdet Zîlanli jî bertek nîşanê êrişa li dijî Baran Temîzaltin hatiyî kirin da û got: “Ji bo wê mijarê me daxuyaniya çapemeniyê da. Xeynî wê jî, bi alîkariya DEM Partiyê me di derheqê êrişkar de serlêdana sûc kir. Em ê bi tu awayî van êrişên li ser zimanê Kurdî qebûl nekin. Ev nêzakatiya li hember Kurdî ji polîtîkayên sîstemê, dewletê çavkaniya xwe digrin. Ev sed sal in dibêjin yek ziman, yek al, yek milet diderkevin pêş me. Zimanê kurdî zimanekî qedîm e. Teqez em van êrişan qebul nakin em şermezar dikin.”
‘Yên ku azadiyê dixwazin divê bertek nişan bidin’
Aktivîstê Zimanê Kurdî Cevdet Zîlanli da zanîn ku di pêvajoya Aştî û Civak a Demokratîk de jî êrişên li ser zimanê kurdî kêm nebûne û wiha axaftina xwe bi dawî kir: “Bangawaziya me ew e, kesên ku dildarên jiyanê, azadiyê ne divê li hember van bûkyeran derkevin. Sazî ûrêxistinên demokratîk divê bertek nîşan bidin. Ji ber ku ev êriş li Edeneyê, Îzmîrê û herî dawî li herêma Trakyayê qewimî. Li her bajarî eriş çêdibin, mirovên me birîndar dikin, sedem jî zimanê kurdî ye, ev nêzîkatî jî li dijî mirovahiyê ye. Mirov çawa ji bo zimanekî dibe xwînmêj? Mirov çawa har dibe? Em dixwazin kesên ku demokrat yê wekheviyê diparêzin saziyên demokratîk, mirovên azadiyê dixwazin bertekê xwe nişan bidin.”
