Mêrdîn – Keşeyê Dêra Protestan a Mêrdînê Ender Peker êrişên li ser Rojava şermezar kirin wiha bang li welatên mesihî kir: “Pêşeroja wan girêdayî Kurdan e, heke Kurd têk biçin ew jî dê têk biçin. Lazim e xwe kerr nekin û piştevaniya gelê Kurd bikin.”
Çeteyên HTŞê, DAIŞê û SMOyê bi piştgiriya Tirkiyeyê ji 6ê Çileyê ve êrişî gelê Rojava dikin. Li dijî van êrişan Kurd li serenserê Kurdistan, Tirkiye, Ewropa û gelek welatên cîhanê dadikevin kolanan û van êrişan şermezar dikin û piştgiriya xwe ji bo Rojava nîşan didin. Rêveberiya Rojava li hemberî êrişan seferberî ragihand û li her çar parçeyên Kurdistanê û li çar aliyê cîhanê nerazîbûn belav dibin. Keşeyê Dêra Protestan a Mêrdînê Ender Peker ji ajansa me re axivî û êrişên li ser Rojava şermezar kir û destnîşan kir ku divê gelê Kurd li dijî êrişan bibe yek.
‘Ev neheqiya li ser Kurdan gelekî mezin e’
Ender Peker diyar kir ku dilê wan gelek bi êrişên li ser Rojava diêşe û wiha got: “Ez weke Kurdekî xirîstiyan li vir im, li Nisêbînê li hemberî Qamişloyê sekinîne. Ev neheqiya li ser Kurdan gelekî mezin e. Li wir hem miletê me yê Kurd heye hem weke ol miletê me yê Mesîhî heye. Lê Kurd heta niha weke netew nehatiye bahev. Gelek parçe parçe bûne dilê min bi vê yekê jî diêşe. Ji ber vê yekê divê Kurd nebêjin ev ji vê partiyê an ji vê hizbê ye. Ji bo Kurdan partî û hizbitî ne lazim e. Heta ku Kurd neyê bahev dê her ev tişt were serê gelê Kurd. Ji ber vê yekê divê her tiştî deynin milekî li cem xwişk û birayên xwe yên Kurd bisekinin. Heke ev yek pêk hat dê çêbibe heke pêk nehat dê rewş xerabtir bibe.”
‘Gelê Kurd bibe yek dê ev êriş bisekinin’
Ender Peker destnîşan kir ku heke gelê Kurd bibe yek û hêza xwe nişan bidin dê ev êriş bisekinin û wiha domand: “Çima peyam hate weşandin ku çar rojan agirbest ragihandin. Ji ber ku Kurd li wir sekinîne bi cihekî ve neçûne. Lazim e yek gav bi peş ve neavêjin. Heke bi paş ve gavavêt dê dawiya wî jî were. Bidestxistina maf ne di destên neteweyên din de ye. Em hêvî nekin ku dê maf bidin me. Maf tu distînî ne ku ew dite te. Heke tu li cihê xwe sekinî berdela wê çi bibe bila bibe dê ew maf were dayîn. Niha çapemenî heye çi bê serê kê em temaşe dikin. Ji ber vê yekê li wir jî çi biqewime hemû dinya dibîne. Wijdana dinyayê dê heta derekê bisekine, pişt re dê ba bi ber te ve were. Ji ber wê lazim e Kurd li cihê xwe bisekine, piştevaniya hevdû bikin miletê Kurd û miletên ku tên perçiqandinê lazim e xurt bibin. Li wir mesihiyên me jî hene, dilê me bi wan gelek diêşe, Ermen, Suryan, Protestan hene. Pêşeroja wan jî girêdayî Kurdan e, heke Kurd têk biçin ew jî dê têk biçin. Bi hev re dijîn. Li milê Hesekê, Qamişloyê û Dêrikê ne. Gelek miletê me yê Mesîhî jî hene. Pêşeroja wan girêdayî gelê Kurd e ne girêdayî terorîstên DAIŞê an HTŞê ye.”
‘Gelê Kurd ji bo wan li hember DAIŞê sekinîn’
Ender Peker têkildarî êrişên li ser Rojava ev bang kir: “Bi taybet bang li welatên mesihî ku Kurdan ji bo wan başî kiriye li hember DAIŞê sekinîn 15 salan li ber xwe dan, hatin kuştin dikim; heke îro hûn Kurdan di nîvê rê de bihêlin êdî tu kes baweriyê bi we naîne. Lazim e xwe kerr nekin û piştevaniya gelê Kurd bikin.”
