Hevserokê Giştî yê DBPê Keskîn Bayindir anî ziman ku kurdan îro li çar aliyê cîhanê bi têkoşîna xwe, xwe daye naskirin û got: “Tenê armanceke me heye. Ew jî azadiya Kurdan û statuya Kurdistanê ye. Heta statuya Kurdistanê dê têkoşîna me bidome.”
Komeleya Alîkarî Piştevanî Yekitî û Çandê ya bi Malbatên Xizmên Xwe li Dergûşa Şaristaniyê Winda Kirin re (MEBYA-DER) li eywaneke dawetê ya li navçeya Peyasa Amedê 4emîn kongreya xwe pêk anî. Kongre bi dirûşma “Aştî û Civaka Demokratîk” pêk hat. Hevserokê Giştî yê Partiya Herêmên Demokratîk (DBP) Keskîn Bayindir, hevşaredar, parlamenter û nûnerên gelek sazî û dezgehan tev li bûn. Kongre, bi rêzgirtinê dest pê kir. Hevserokê Giştî yê DBPê Keskîn Bayindir axivî û wiha got: “MEBYA-DER ne tenê komele û saziyek e. Tevgereke wîcdanî ye. Ji ber ku ev komele komeleya deh hezaran malbatên şehîdan û komeleya tevgera gelê kurd e.”
Keskîn Bayindir da zanîn ku îro 29ê Hezîranê ye û wiha axivî: “Salvegera darvekirina Şêx Seîdê Kal e. Salvegera darvekirina rêber û pêşengê gelê Kurd e. Em ji 1925an heta niha bejna xwe li pêşberî hemû şehîd û cangoriyên xwe ditewînin. Dema Şêx Seîd çû ber Sêdarê got ‘Divê neviyê min bi min serbilind dibin û bila me rûreş nekin.’ Em îro li vir dibêjin bi deh hezaran neviyên de li vir in û hûn rûreş nekirine. Dîroka Kurd û Kurdistanê ya bi sed salan her tim bi kuştin û qirkirinê derbas bûye. Li ser bihosta axa Kurdistanê zilm hatiye kirin. Li aliyekî zilm û zordarî heye. Lê li aliyê din ku em pê serbilind û serfiraz in, li ser bihosta vê axê têkoşîn û berxwedan jî heye. Ji serê çiyayê Kurdistanê heta zindanan li ser her bihostê têkoşîn û berxwedan heye. Vê têkoşîn û berxwedanê îro pêvajoyek da destpêkirin. Ne ku ev dewlet dostê me bû ku ev pêvajo dan destpêkirin. Ev pêvajoya ku Rêber Abdullah Ocalan wekî pêvajoya “Aştî û Civaka Demokratîk” bi nav dike, bi têkoşîna gelê kurd û tevgera azadiya Kurdistanê pêş ketiye. Bi sekn û têkoşîna Rêberê Rêberan Rêzdar Ocalan pêş ketiye. Ji darvekirina Şêx Seîd heta niha gotin em ê Kurdan tune bikin, lê ji ber berxwedana kurdan êdî tu rê ji wan re nema.”
Keskîn Bayindir anî ziman ku divê ew heqîqeta têkoşîna gelê kurd û Rêberê xwe bibînin û wiha lêzêde kir: “Her santîmê Kurdistanê bi têkoşîn û berxwedanê hatiye bi destxistin. Li çar aliyê cîhanê îro qala Kurdan û statuya Kurdan dikin. Ev nîşan dide ku Kurd êdî bi rêber û têkoşîna xwe hêzeke cîhanî ne. Ev hêz d^Fe bigêjearmanca xwe Armanca me asadî ye. Armanca me sattuya Kurdistanê ye.”
Heta statuya Kurdistanê dê ev têkoşîna me bidome.
Keskîn Bayindir, da zanîn ku ji bo statuya xwe bi dest bixin jî pêdivî bi rêxistinkirin, yekîtî, hezkirinê kir û wiha bi dawî kir: “Rêber Abdullah Ocalan di 2013an bang li rêzanê Kurdan, partiyên kurdan kir û xwest di bin sîwanekê de bibin yek. Xwest di bin sîwana Kongreya Kurdistanê de hemû hêzên Kurdistanê bibin yek û parastina gelê Kurdistanê bikin. Xwest parastina hiqûq û dîplomasiyê pêş bixin. Hêzên xêrnexwaz bûn asteng. Îro 12 sal şûnde dîsa ev derfet li pêşberî me ye. Îro dîsa Birêz Ocalan banga Kongreya Neteweya Kurdistanê dike. Em jî li vir bang li hemû sazî û rêxistinên çar aliyê Kurdistanê dikin. Em dibêjin deng bidin dengê Birêz Ocalan. Ev mesele meseleya pêşroja gelê Kurd e. Ji ber ku li çar aliyê Kurdistanê şer e. Kurd bi parçebûnê nikarin xwe biparêzin. Lê hêza me li çar aliyê Kurdistanê heye. Divê gelê xwe di bin sîwana Kongreya Kurdistanê diparêzin. Statuya xwe mîsoger bikin. Ev li me ferz e. Ji bo wê divê em bixebitin.”
