Hepsîyo sîyasî Havil Acar ke 31 serrî ra dima Hepisxaneyê Tîpê T’yî yê Bolvadînî ra ame veradayene, şaristanê xo Êlih de hetê girseyêk ra ame pêşwazîkerdene.
Havil Acaro ke Hepisxaneyê Tîpê T’yî yê Bolvadînî yê Afyonî de mendêne, 31 serrî ra dima ame veradayene. Acar, dewa xo Xincika ya girêdayeyê Êlihî de bi govend û şayîye ame pêşwazîkerdene. Keyeyê Acarî, îdarekarê Komela Pawitiş û Paştîdayîşê Keyeyanê Hepsî û Hukimweran (TUAY-DER), temsîlkarê partîyanê sîyasîyan û sazîyanê komelkîyan zî tewrê pêşwazîkerdişî bîyî. Acarî da zanayene ke keyfweşîya ey nêmcet a û veradayîşê hepsîyanê sîyasîyanê nêweşan waşt.
Acar, serra 1994î de Êlih de amebi tepiştene. Acar, zîndananê Êlih, Yozgat, Dîlok, Mêrdîn, Tokat û peynî de zî Zîndanê Tîpê T yê Bolvadînî yê Afyonî de mend.
