Qezaya Hezexî de derheqê prosesî de kombîyayîşê şarî ame kerdene û kombîyayîşî de ame dîyarkerdene ke nê kombîyayîşê şarî bi waştişê Abdulah Ocalanî yenê kerdene û Ocalan wazeno şarî bigoşdaro.
Qezaya Hezexî ya Şirnexî de bi beşdarîya Veysî Aktaş ke 10 serrî Rayberê Şarê Kurdî Abdullah Ocalanî reyde Hepisxaneyê Îmraliyî de mendo, avûkatê Ocalanî, wesîyê ey Mazlum Dînç, Hemşaredara Êlihî Gulîstan Sonuk û seyan welatijan “Kombîyayîşê Aştî û Komelê Demokratîkî” ame kerdene. Kombîyayîş awanîya DEM Partî ya Hezexî de ame kerdene û kombîyayîş bi rêzgirewtişê seba cangorîyanê azadîye dest pêkerd. Dimayê rêzgirewtişî sloganê, “Şehîd namirin” , “Bijî Serok Apo” û “Bê Serok jîyan nabe” ameyê vatene.
‘Amancê Serekî demokrattîkerdişê komelî yo’
Kombîyayîşî de ewil Gulîstan Sonuk vat ke seba te şarî tewrê prosesî bikerê nê kombîyayîşan kenê û wina vat: “Amancê kombîyayîşan o yo ke proses şarî reyde bêro rayraberdene. Nê prosesî de çi kêm o, ganî çi bêro kerdene, seba ney ma şima reyde kom benê. Her kes prosesî nêzdî ra taqîb keno. Ganî ma komelê demokratîkî awan bikerê. Amancê Serekî no yo. Heta ke ma têkilîyanê xo heme hetanê komelî reyde nêronê û komelêko rêxistinkerde awan mêkerê, ma nêeşkenê komelêko demokratîk awan bikerê. Awankerdişê komelê demokratîkî zereyê keyeyî ra dest pekeno. Ganî ewil aştîya mabêne cinî û camêrdî da bêra kerdene û bi nê jewayî ma eşkenê bibê hemrayê Rayber Apoyî. Heta ke serdestîya mabênê cinî û camêrdî de biba û na çareserî nêresena encamêk. Ganî teqez têduştîya cinî û camêrdî biba.”
‘Ganî ma xo rêxistin bikerê’
Gulîstan Sonul dewamê qiseykerdişê xo de bale ant encamanê kombîyayîşî ser o û qiseykerdişê xo wina domna: “Seba şarê kurdî tewr muhîm o yo ke nê prosesî de xo rêxistin bikero. Ganî rêxistinbîyayîşê xo ma bikerê û ma bieşkê xo rayra berê. Wezîfeyê ma pêrûnan o sereke o yo ke ma xo goreyê ruhê prosesî bibedilnê. No kombîyayîş bi waştişê Serekî yenê kerdene û Serek wazeno şarî bigoşdaro. Ma do heme detayanê nê kombîyayîşan bîyarê pêser û biresnê Rayber Apoyî.”
Qiseykerdişê Gulîstan Sonuk ra pey kombîyayîş bi erjnayîşanê Veysî Aktaş, Mazlum Dînç û şarî, çapemenî rê girewte dewam kerd.
