Akademîya Mîr Celadet Elî Bedîrxan a qezaya Peyasî ya Amedî, bi munasebetê 15ê Gulane Roşanê Ziwanê Kurdkî pîrozkerdiş viraşt. Beşdaran dîyar kerd ke ziwan û kultur bingeyê estbîyayîş û nasnameyî yo.
Akademîya Mîr Celadet Elî Bedîrxan a ke binê banê Mudirîyetîya Ciwan û Karanê Ciwanan ya Şaredarîya Peyasî de kar kena, bi munasebtê 15ê Gulane Cejna Ziwanê Kurdkî pîrozkerdişêk viraşt.
Wendekarê Akademî ameyê têhet û bi tewrbîyayîşê hunermenda Japonî Erika Ueda û hunermendê kurdî Serdar Canan kêfweş bîyê. Pîrozkerdiş de Hemşaredarê Peyasî Berîvan Gulşen Sîncar û Cengîz Dundar, cagirê hemşaredaran, endamê Meclîsê Ziwanî yê Peyasî û xeylê wendekarî amade bîyê.
Hunermendan serê muhîmîya ziwanî kurdkî, muzîkê kurdî û pawitiş û averberdişê ziwanê dayîkê qisey kerd. Sewbîna ame dîyar kerdene ke ziwan û huner bingeyê estbîyene, nasname û vîr ardena şaran o.
Badê qiseykerdişan beşdaran deyîran reyde de govende girewte.
