Akdeniz de şar û ciwanî rixmê hêrişanê polîsan bi xoverdayîşî vera qeyûman wayîrê îradeyê xo vejîyenê.
Roja pancine de vera destsernayîşê Şaredarîya Akdenîzî taxanê Yenîpazarî û Demîrtaşî de protestoyan dewam kerd.
Wekîlanê DEM Partî Perîhane Koca, Mehmet Zekî Îrmez û George Koca, Mayanê Haştîye û xeylê kesan waşt ke çalakîya roniştişî bikerê. La polîsan bi bahaneya qedexeyî girse asteng kerd.
Perîhane Koca vera ney nêrazîbîyayîşê xo mojna û vat: ”Şima qestî ra zulmê şarî kenê. Zîyaretê ma yê bi esnafan zî ameyî astengkerdene. Barîkatê ke ma verî de ronîyenê, verê kiştoxan û tecawuzkeran de nêronîyenê.”
Şarî rixmê astengîyan zî esnafî zîyaret kerdî û verê bînaya DEM Partî de dest pê çalakîya roniştişî kerd. Çalakîye de sloganê sey “Akdenîz ya me ye”, “Bijî Berxwedana gelê Kurd”, “Qeyûmê diz, ji Akdenîzê bicihime”, “Bijî Serok Apo”, “Bê Serok jiyan nabe” ameyî vatene.
Dima eşkerayîye dîyaye çapemenîye. Zekî Îrmezî çalakîye de vat: ”Ma pêro şarê xo selam kenê. Heta ke hemşaredarê ma abigêrê karê xo ser ma do waran de bîyê. Ma nê destsernayîşî qebul nêkerê û sereyê nêarê war. Ma venga her kesî danê ke siba ssaete 13.00 de verê şaredarîye de kom bibo. Ganî her kes bi ruhê seferberî tewrê nobete bibo.”
Ciwanî zî 5 rojî yo vera destsernayîşî xo ver danê. Ciwanan taxa Yenîpazarî de cewab da hêrişanê polîsan û bi molotof, fîşekanê hewayî û kerrayan hêrişê polîsan şiknayî. Ciwanan sloganê ”Bijî Serok Apo” vat. Polîsan gazê îsotî verda taxe. Şarî zî seba paştdayîşê ciwanan pacan ra lîmonî dayî ciwanana.
