Aktîvîstê TJA yê Sêrtî derheqê rayîrşîyayîşî de ke do 19ê aşme de Gemlîk de seba azadîya fîzîkî ya Rayberê Şarê Kurdî Abdullah Ocalanî bêro kerdene, veng da cinîyan: “Ma veng danê heme cinîyan ke Gemlîk de ma pîya seba azadîya fîzîkî ya Rayberê Şarê Kurdî biqîrê.”
Meclîsê Cinîyan ê Partîya Demokrasî û Têduştî ya Şaran (DEM Partî) û Têgêrayîşê Cinîyan ê Azadan (TJA), bi sloganê “Dem demê azadîya cinîyan û Rêber Apo yo” 18ê aşme de herêma Botan, Serhed û hetê Tirkîya ra yenê pêser û ver bi Gemlîk kewenê rayîr. Cinîyê ke do bikewê rayîr, 19ê aşme de saete 13:00î de rayîrşîyayîşê xo bidê destpêkerdene. Hemsereka Sêrtî ya DBP’yî Muazzez Bulga û aktîvîstê TJA Kiymet Mut û Hasret Arslan derheqê rayîrşîyayîşî de ajansê ma re qisey kerd.
Hemsereka Sêrtî ya DBP’yî Muazzez Bulga ard vîr ke serre û nêm o ke Rayberê Şarê Kurdî Abdullah Ocalanî yew proses dayo destpêkerdene û wina vat: “Rêzdar Ocalanî veng da Têgêrayîşê Azadîye yê Kurdî û înan zî nê cewab da vengdayîşê ey. Naye ra pey êdî bar kewt milê dewlete ser o. Labelê çi heyf ke heta nika dewlete tu gamêka şênbere nêeşta. Nê semedî ra hêvîya şarê kurdî û cinîyan nê prosesî ra birîyena. Her çend komîsyonêk amebi awankerdene zî, hema zî tu çî nêvejeyo orte.”
‘Azadîya ciwanan û azadîya her kesî ya’
Aktîvîsta TJA ya Sêrtî Kiymet Mut zî bal ant bêgamîya dewleta tirkan ser o û wina vat: “Seba azadîya fîzîkî ya Serekî, ganî dewleta tirkan bilez gaman bierza. Êdî sebirê şarê kurdî nêmendo, çunke dewlete bi xapînayîş nêzdîyê prosesî bena. Serekî gamê tewr pîlî eştî, ganî dewlete zî gaman bierza. Vengdayîşê ma seba her kesî yo ke wayîrê rayîrşîyayîşê Gemlîkî vejîyê. Azadîya Serekî, azadîya şarê kurd, azadîya komel û ciwanan a.”
