Hemserekê Odeya Endezyaranê Awanîyan ê Şaxê Amedî (ÎMO) Mahsun Çiya Korkmaz dîyar kerd ke Amed erdlerzî ra nê hadre yo û waşt lezûbez seba erdlerzî projeyan bêrê hadrekerdiş.
Kurdistan û Tirkîya de xetanê erdlerzî zêde yê. Her serre erdlerzanê tund pê yenê. Erdlerzanê 30 serranê peynî de bi se hezaran welatijî cuya xo dest dayê. 2 serre verê 6ê Sibata 2023î de 10 şaristananê ke merkezê erdlerzî yê Pazarcix û Elbîstanî yê Mereşî bî, erdlerzanê hêzê înan 7.8 û 7.5 pêl pê ameybî. 10 şaristanan goreyê daneyanê fermî 53 hezar û 537 merdiman û goreyê daneyanê nê fermî zafêrî 100 hezar merdiman cuya xo dest dabî. Her wina 23ê Nîsana 2025î de Stenbol de erdlerzê hêzê ci 6.2 pê ame. Erdlerz de merdiman cuya xo dest nêdayê.
Dewleta Tirk “bacê erdlerzî” kom kena la no bac seba erdlerzî nêkeno xizmetê welatijan. Derheqê babeta erdlerzî de Hemserekê Odeya Endezyaranê Awanîyan ê Şaxê Amedî (ÎMA) Mahsum Çiya Korkmaz ajansê ma rê qise kerd.
Warê pêserameyîşî kêm ê
Mahsum Çiya Korkmaz dîyar kerd ke verê înan de di çik est ê û wina va: “Xebata yewin wa verê erdlerzî hadreyî bêrê kerdiş. Ya diyine zî peynîya erdlerzî wa hetkarî bêrê kerdiş. Xetê şeqyayî yê Çewlîgî ra derbas beno. Demo ke ma ewnîyenî ti hadreyeyî çin o. Awanîyanê ke verê 2010î ameyî awankerdiş seba ma telûkeyî yê. Seba ci ma nêzanenî ke nê awanîyan senî ameyî viraştiş. Projeya înan est ê? Qatanê zêde û bi dizî ser înan ameyî awankerdiş ya nê? Ma nêzanenî. No ser zî Amed seba ma zaf xetere yo. Peynîya erdlerzî felaketo ke do pê bêro, şaristan çiqas hadre yo? No zaf avzel o. Waranê pêserameyîşî zaf kêm ê, tena Peyas de cayî est ê. Sey bîn mîyanê şaristanî de waranê pêserameyîşî çin ê. Hetê Koordînasyonê AFAD’î tay warî sey warê pêserameyîşî ameyî dîyarkerdiş la ê zî tena ser nexşereyî est ê. Ca û waranê pêserameyîşî awanî ameyî viraştiş, seba Amedî nê waranê pêserameyîşî zaf avzel ê, wa perwerdeyê hişmendîya erdlerzî pê bêro. Amed erdlerzî ra nê hadre yo.”
‘Qeyûmî texrîbatêko gird viraşt’
Mahsum Çiya Korkmaz vîr ard ke dewlet bacanê erdlerzî seba hadreyîya erdlerzî bikar nêanena û wina domna: “Dewlete vano ke nê bacanê erdlerzî seba rayîran bikar arda, no şaş o. Ma nêzanenî no raşt ya zî şaş o. Semtê Ofîsî yê Şaristanê Neweyî destûrê awanîyan zemîn û 4 qat est ê la demo ke ma ewnîyenî zaf awanîyan de qatanê qaçax est ê. Rayberîya Herêmî seba erdlerzî qels o. Sey Odeya Endazyaranê Awanîyan nêzdîbîyayîşê ma zelal o. Verba pratîkê qeyûmî yê xeletî çi destê ma ame, ma kerd. Demo ke ma doz akerd û hetanî qerar ame dayîş, awanî ameyî înşakerdiş. Qeyûmî Amed de texrîbato gird viraşt. Wa seba erdlerzî hişmendîyêka newe aver şîra, wa şaredarîyanê ma zî projeya “bedilnayîşê şaristanî” ya zî “xurtkerdişê awanîyan” pê bîyarê, seba menfeatê şarî awanîyan înşa bikerê.”
