Welatijan derheqê xofesihkerdişê PKK’yî dîyar kerd ke PKK û Rayberê Şarê Kurdî Abdullah Ocalanî heme çî kerd û vat: “Ganî dewlete êdî heqanê kurdan bişinasna û gamanê şênberan bierza.”
Rayberê Şarê Kurdî Abdullah Ocalanî 27ê sibate de vengdayîşê “Aştî û Komelo Demokratîk” kerd û waşt ke PKK xo fesih bikera. Partîya Karkeranê Kurdîstan (PKK) 1ê adare de adirbest îlan kerd. Rixmê qerarê PKK’yî zî hêrişê dewleta tirke dewam kerdê. PKK 9ê gulane de eşkerayî daye û dîyar kerd ke binê hêriş û dorpêçkerdişê PDK’yî de mabênê 5 û 7ê gulane de beyanatê kongreya xo ya 12. eşkera kerd. Encamê kongreyî de ame vatene ke înan xebatê nameyê PKK’yî ser o qedênayê û PKK’yî xo fesih kerdo. Derheqê xofesihkerdişê PKK’yî de welatijanê Amedî ajansê ma rê qisey kerd.
‘Ganî dewlete heqanê ma bida’
Welatija bi nameyê Remzîye Oluçe dîyar kerd ke ê wazenê aştî bîyarê ca û wina qisey kerd: “Ma wazenê mîyanê aştî de biciwîyê. Nê çend serrî yê ma bindest ê. Ma xeylê zilm dî û xeylê bedêl da. Ganî birêz Abdullah Ocalan bi hewayêko azad êdî fikranê xo vajo.”
‘Rayberê ma azad nêbo ma zî azad nêbenê’
Welatijo bi nameyê Omer Erdoganî da zanayene ke çekronayîşê PKK’yî xeylê balkêş o û wina vat: “Ganî her di hetî dirust bibê. PKK’yî game eşte, ganî dewlete şarî nêxapêna. Wa şar mîyanê aştî de biciwîyo. Şarê kurdî wazeno ke sey şaranê bînan têduşt biciwîyo. Ma zî sey şaranê bînan nasnameyê xo wazenê. Ma perwerdeyê ziwanê Kurdkî wazenê. Nê waştişê zaf nîyê, nê heqê ma yê. Ma vanê ke ma mîyanê aştî de seypê biciwîyêç Wa azadîya fîzîkî ya Rayberê Şarê Kurdî Abdullah Ocalanî bêra ca. Rayberê ma azad nêbo ma zî azad nêbenê.”
‘Heta ke Abdullah Ocalan azad nêbo aştî nêyena ca’
Welatijê bi nameyê Harun Akici dîyar kerd ke qerarê PKK’yî bî verî ameyêne ca la yê ke aştî nêwaştêne est bîyê û nê çîyî vatî: “La ma hêvîdar ê ke na reye aştî biba. Ganî dewlete gaman bierza. Ganî hepisxaneyî veng bibê, zilm û zordarî şarê ser o biqedê. Pêroyî dinya de nêweşî hepisxane de nêmanenê la Tirkîya de manenê. Seba aştî ma hêvî kenî ke pêro girewteyî veradîyê. Azadîya Abdullah Ocalanî ganî bêra ca. Xora Abdullah Ocalan azad nêbo, aştî nêyena ca.”
‘Ganî êdî heqê şarê kurdî bêrê dayene’
Welatij Devran Bulutî zî dîyar ker de qerarê PKK’yî xeylê muhîm o û wina vat: “Nê rayîrî de xeylê kesan cuya xo vîndî kerde. Ma keyfweş î ke êdî do kes nêmiro. Hesrê heme dayîkan yew reng ê. Ganî êdî heqê kurdan bêrê dayene. Ewro maya mi tirkî nêzana. Maya mi demo ke şona teyaregeyî bi xeylê ziwanan anons kenê la kurdkî nêkenê. Maya mi nêeşkena problemanê xo vaja. Ewro ma bi keda înan ameyê na aste.”
Ganî Birêz Abdullah Ocalan zî azad bibo
Abdulkudus Kaynak zî dîyar kerd ke şarê kurdî her dem aştî wazeno û wina vat: “Ma hêvîdar ê ke do heme çî baş bibo. Êdî wa aştî bêra ca. Birêz Abdullah Ocalan xeylê serran o hepisxane de yo. Ganî Birêz Abdullah Ocalan zî azad bibo. Azadîya Abdullah Ocalan nê prosesî zî aver bero.”
‘Birêz Abdullah Ocalan azad bibe û were nava gelê xwe’
Welatijo bi nameyê Siddik Baran zî dîyar kerd ke seba prosesî xeylê keyfweş ê û wina qisey kerd: “Aştî bêra ca do welatê ma de aramî biba. Wa şer welatê ma ra dûr bikewo. Ganî girewteyê sîyasîyî bêrê veradayene. Birêz Abdullah Ocalan azad bibo û bêro şarê xo mîyan.”
