Rayberê Komela Ekolojî ya Amedî Necdet Sezgînî dîyar kerd ke îqtîdar do dest bi akerdişê maden û sondajanê neweyan bikero, îhaleyî ameyê kerdene û şîrketî zî ameyê amadekerdene û vat: “Seba ke ma vera sondajan vinderê, ma xo amade kenê.”
Wezîrê Çimeyanê Enerjî û Tabîyî Alparslan Bayraktar 29ê Teşrîna Peyêne beşdarê programêk bi û uca de dîyar kerdbi ke Amed de do 4 qadan de 24 sondajê neweyî yê petrolî bêrê akerdene û dest bi gêrayîşê petrolî bikerê. Rayberê Komela Ekolojî yê Amedî Necdet Sezgîn derheqê qerarê wezaretî û talankerdişê xoza ajansê ma rê qisey kerd.
‘Akerdişê sondajanê petrolî xoza talan kenê’
Necdet Sezgîn dîyar kerd kerd pêroyê Kurdîstanî de plansazîya gêrayîşê madenî est a û wina vat: “Serekkomarê Tirkîya û Serekê Amerîkayî gêrayîşê madenî ser o pêkerdo. Nê semedî ra her kes mîyanê têgêrayîşî de yo û paweyê herêmanê neweyan o ke dest bi gêrayîşê madenî bikerê. Na plansazîya demêko derg o ke yena amadekerdene. Ma zî sey sazgeh û dezgehanê ekolojîyî mîyanê hewldayîşan de yê ke vernîya akerdişê maden û sondajan bigîrê. Ma zî dewe û qezayanê Amed de şarî reyde kewtê mîyanê têgêrayîşî. Ma kombîyayîşî organîze kerdê û şarî reyde behsê tesîro negatîf ê madenan kerd. Akerdişê qadanê maden û sondajan talankerdişêko pîl xoza ser o keno. Ganî pêroyê şar û sazgehanê ekolojî vera talankerdişê xoza pîya têkoşîn bidê.”
‘Îhaleyî ameyê viraştene û şîrketî zî ameyê amadekerdene’
Necdet Sezgînî dîyar kerd ke Herêma Besta, Koyê Cûdî, Zozanê Hesendînî yê qezaya Pasûr û tayê cayanê Licê de hewldayîşanê îqtîdarî est ê û nê çîyî vatî: “Ma şarê herême reyde ameyê têhet û ma behsê talankerdişî kerd. Ma vera talankerdişî mîyanê têgêrayîşî de yê. Ewro xeylê herêman de gêrayîşê madenan dewam keno û yeno vatene ke dı xeylê sondaj bêrê akerdene, seba nê ma hûmara pêro sondaj û madenan nêzanê. La ma zanê ke her şaristanê vakurê Kurdîstanî de hewldayîşê îqtîdarî est ê û wazenê xoza talan bikerê. Îhale ameyê viraştene û şîrketî zî ameyê amadekerdene. Ma zî seba ke vera akerdişê sondajan vinderê, xo amade kenê.”
‘Mîyanê komel û xoza de aştî çin ba, cuye zî do biherimîya’
Necdet Sezgîn ard vîrî ke aştî tena mabênê merdiman de nêyena ca û qiseykerdişê xo wina qedîna: “Lazim o ke cuya pêroyê gandaran bêra pawitene. Demo ke aştî mabênê merdiman de est ba la mabênê merdim û xoza de çin ba, tu manayê aştî çin a. Aştîya komelkî girêdayeyê aştîya xozayî ya. Şer kamca de est bo ma vera ci yê. Mîyanê komel û xoza de aştî çin ba, cuye zî do biherimîya. Xirabîyê ewroyî dinya de yenê kerdene, sebebê ci şerê mabênê merdim û xoza de yo.”
