Sereka TransformEurope Barbara Steiner vat: “Ocalan hema zî binê tecrîdî de bo, çew senî eşkeno qala aştî bikero? Seba ke pêvînayîşê aştî hol aver şirê azadîya Ocalanî şert a.”
Sereka weqfê perwerdeyî yê Partîya Çepe ya Ewropa TransformEurope û endama Partîya Komunîste (KPO) zanista sîyasetî Barbara Steiner qerarê qedînayîşê têkoşînê çekdarî yê PKK’yî û merasîmê sembolîkî yê çekveşnayîşî sey “gama tarîxî û cesure” pênase kerd û vat semedê aştîya menda gerek Rayberê Şarê Kurdî Abdullah Ocalan bibo azad û zextê Tirkîya yê vera kurdan biqedîyê.
Barbara Steiner nê vatî: “Qerarê qedînayîşê têkoşînê çekdarî û PKK’yî û gama ci ya sembolîke ya veşnayîşî nê demî de ke dinya de şerî dewam kenê û Rojhelatê Mîyanênî de gonî yena rişnayene, semedê qedînayîşê şîdetî gamêka tarxî û cesure ya. No proses tena semedê kurdan û tirkan nê pêkewtişê dewleta tirke bi kurdan ra wet nimûneyêka pîl a. Nika zaf muhîm o ke dewleta tirke nê prosesî de parlamento de bi ronayîşê komîsyonî semedê muzakerdoxan destpanêdayîşo fermî pê bîyaro, girewteyanê sîyasîyan verado û bi taybetî azadîya Ocalanî bîyaro ca.”
Barbara Steiner îfade kerd ke a paştî dana kampanyaya “Ez wazenê Ocalanî bivîna” û vat: “La tena zîyaretkerdiş qîm nêkeno, gerek tecrîdo ke serê Ocalanî de yo bêro wedaritene. Ocalan pêvînayîşanê aştî de muzakerdoxo verên o. Gerek dewleta tirke hinî zextanê vera kurdan biqedîna. Prosesê aştî komelê mîyanneweteyî de zaf eleqe anceno xo ser. No proses verî ser nêkewt bi la ez hêvî kena ke na rey ser bikewo. No proses gerek tena mabênê dezgehan de memano, komel zî tede ca bîgiro. Ocalan hema binê tecrîdî de bo, çew senî eşkeno qala aştî bikero? Seba ke pêvînayîşê aşt hol aver şirê azadîya Ocalanî şert a. Azadîya Ocalanî tena semedê ey nê semedê azadîya komelî zî muhîm a.”
Barbara Steiner wina dewam kerd: “Seba ke prosesê aştî raşt aver şîro, gerek komelê mîyanneteweyî şîro Tirkîya ser; krîmînalîzêkerdişê Têgêrayîşê Azadîye yê Kurdan bêra qedînayene, qedexeyê PKK’yî Yewîya Ewropa, Amerîka û welatanê bînan de bêro wedaritene. Coka kesê ke bi sebebê falîyetanê PKK’yî ra ameyî girewtene gerek serbest bêrê veradayene. Ewropa eşkena semedê pêvînayîşanê aştî biba zemîno bêhet. Tarîx de yeno vînayene ke cayanê bêhetan de bi garantîya hetê hîrêyînî çareserîya probleman dahîna rehet bena. No proses tena kurdan û Tirkîya eleqedar nêkeno. Bi şaranê bindestan ê Tirkîya û Kurdîstanî sînordar nîyo; no pêro Rojhelatê Mîyanênî û prosesanê aştîya globale ya ke bi rayîranê demokratîkan gerek serkewê, gêno mîyanê xo.”
