Rayberê Şarê Kurdî Abdullah Ocalan pêvînayîşêk de ziwan ser o tayê mesajî erşawitî û waşt ke her kes wayîrê ziwanî vejîyo. Hemverfekê Lijneya Ziwan, Kultur û Hunerî yê DEM Partî Heval Dilbihar û Endamê Komîsyonê Ziwanî yê OHD’yî Mehmet Emîn Gokdemîrî dîyar kerd ke ganî her kes ziwanê Kurdkî bipawo.
Keyeyê Rayberê Şarê Kurdî Abdullah Ocalanî 7ê temmuze de ey reyde pêvînayîşêk kerd. Rayberê Şarê Kurdî Abdullah Ocalanî nê pêvînayîşî de bale ant babeta ziwan û kulturî ser o. Hemverfekê Lijneya Ziwan, Kultur û Hunerî yê DEM Partî Heval Dilbihar û Endamê Komîsyonê Ziwanî yê OHD’yî Mehmet Emîn Gokdemîrî ajansê ma rê qisey kerd.
‘Abdullah Ocalan vano bê nan û awe beno la bê ziwan nêbeno’
Heval Dilbaharî dîyar kerd ke Rêzdar Ocalanî heta nika muhîmîya ziwanê dayîke, bi taybetî zî ziwanê Kurdkî ser o erjnayîşê bingeyinî kerdê û wina qisey kerd: “Rêzdar Ocalan ziwanê dayîke hende muhîm vîneno ke erjnayîşanê xo de dîyar keno ke bê nan û awe beno la bê ziwan nêbeno. Ocalan xeylê reyan bi taybetî dîyar kerdo ke yê ke nêeşkenê ziwanê dayîke rê wayîr vejîyê û ey bipawê, nêeşkenê çîyêk rê wayîr vejîyê û bipawê. Ocalan zaf reyan vato ke sebeb û çimeyo bingeyîn û sereke yê têkoşînê înan o 50 serran; şiknayîş û orte ra wedaritişê çinhesibnayîşê Kurdkî yo. Eke ziwanê Kurdkî orte ra wedarîyo, wextî reyde kurdî zî do sey netew orte ra wedarîyê. Na çarçewa de xeylê zelal keno ke ziwanê Kurdkî seba netewa kurd hêmano bingeyin o û ganî kurdî her şert û mercan de ziwanê xo bipawê û aver berê. Çi heyf ke rixmê têkoşîno bi desan serran de sere de sîyasetmedar, xeylê kurdî ke nameyê kurdan ser o hereket, platform, sazgeh û dezgehanê cîyayan de pêşeng û berpirsîyar ê kurdkî nêzanê, nêmusenê, nêmusnenê, cuya xo bi kurdkî nêciwîyenê seba kurdkî têkoşîn û xebatanê şênberan nêkenê. Bi nê hewayî xizmetê asîmîlasyon û helînayîşê vera Kurdkî kenê; yanî benê hemparê kiştişê Kurdkî. Ya tewr sosrete na rewşe normalîze kenê. Mo xeylê tehluke yo û nêyeno qebulkerdene.”
‘Dewlete de tena ziwanê Tirkî yeno qebulkerdene’
Mehmet Emîn Gokdemîr zî dîyar kerd ke Mehmet Ocalan eşkerayîyêk dabî û na eşkerayî de vatbî, birêz Ocalan wazeno sere de heqê ziwan û kulturê Kurdkî bêro naskerdene û wina qisey kerd: “Abdullah Ocalan vengdabi şarî ke ziwan û nasnameyê xo rê wayîr vejîyê. Nika ma vînenê nê prosesî de şerê bi çekan qedîyayo. Bi çekronayîşê PKK’yî aseno ke bi sîyasetêko demokratîk û rayîr û rêbazanê neweyan do kurdî heqanê xo bipawê. Do senî bibo ke nê prosesî aştî de kurdkî bêro qiseykerdene? Goreyê mi qanûn û qedexeyanê nikayînan de, goreyê qanûnê esasî yê 1876î yewbînan ra aqitnayîşê ziwanê Kurdkî û Tirkî dest pêkerd. Bi îttîhat û terrakî ziwanê dewlete tena ziwanê tirkî yeno qebulkerdene. Demê osmanîyan de zî wina bi û serra 1923î ra pey zî wina dewam kerd. Demo ke Komara Tirkîya awan bîye qanûnê tevhîdê tedrîsatî, qanûnê takrîrî sikûnî, qanûnê elfabeyî est bî. Qanûnê bingeyinî de zî hema zî yeno pawitene û mevzûat de ca gênê. Lazim o sere de nê qanûnî bêrê bedilnayene. Dewlete vana nê qanûnî nêrê bedilnayene.”
