Paytextê eyaletê Mînas Geraîsî yê Brezîlya, Belo Horîzonte de, rêxistinê sosyalîst, azadîwaz û komelê sîvîlî ke têgêrayîşê kurdan û fîlîstînjian zî mîyanê înan de bîyî, ameyê têhet.
Kombîyayîşê Belo Horîzonte de ame vatene ke şerê Rojhelatê Mîyanî û pêkewtişê hêzanê globalan tena bi herême sînorkerde nîyê, Amerîkaya Latîne de zî netîceyê sîyasî û ekonomîkî yê muhîmî virazenê. Beşdaran rewşa hereketanê komelkîyan, krîzê ekonomîkî û tedayê dewletan ê welatanê Amerîkaya Latîne nirxnayî.
Kombîyayîş Abîdeyê Heqanê Merdiman ê Belo Horîzonteyî de virazîya, awanîyêka ke dewrê dîktatorîya leşkerî de sey merkezê îşkence û destbendkerdişî ameyêne şuxulnayene, bi cehdê şarî bî muzeyê heqanê merdiman û xoverdayîşî. Ame vatene ke viraştişê kombîyayîşî nê cayî de, mîyanê tedayanê dewlete yê vîyarteyî û têkoşînanê heqanê merdiman ê nikayî de girêdayîyêka sembolîke armanc kerdo.
Kombîyayîş bi vengê Komîteya Piştîdayîşê Fîlîstînî ame viraştene; beşdaran îmtihanê otonomî, demokrasî û rêxistinbîyayîşê komelkî yê Têgêrayîşê Azadîye yê Kurdîstanî erjna. Endamanê Komîteyê Fîlîstînî vat ke fehmkerdişê têkoşînê şarê kurdî do kede bido averberdişê hacetanê ke têkoşînan vera polîtîkayanê jenosîdî yê dewletan yew bikerê.
Endamanê IHG’yî vist virî ke Şorişê Cinîyan ê Rojawanî, bi taybetî bi rêxistinbîyayîşê cinîyan, hereketanê çepgiran ê seserra 21. rê roşnîya hêvîye dano. Dewrê kombîyayîşî de belgefîlmê kampanyaya azadîya Rayber Apoyî ame mojnayene û prensîbê Konfederalîzmê Demokratîkî ameyî nirxnayene.
Têgêrayîşê Azadîye yê Kurdîstanî vat ke munaqeşayê Tirkîya seba bêhereketîye û bêvengîya dewlete bi zehmetanê girdan aver şonê. Vat ke azadîya Rayber Apoyî mifteyê bingeyîn ê destpêkerdişê prosesêko vurîyayîşê sîyasî yo.
