Komela Zanistî ya Wendekaranê Komelnasî yê Unîversîteya Tarbîat Modaresî eşkera kerd ke cenazeyê zafêrê 50 cinîyanê çalakîker tibê edlî yê Tehranî de yê ke nasnameyê înan hema nêameyo eşkerakerdene.
Komela Zanistî ya Wendekaranê Komelnasî yê Unîversîteya Tarbîat Modares a Îranî (Sociology Student Scientific Association of Tarbiat Modares University) derheqê kiştişanê cinîyanê çalakîker ê Rojhelatê Kurdîstan û Îranî yê hetê rejîmê Îranî ra raporêk vila kerd.
Goreyê raporî hema tewr kêm 50 cenazeyê cinîyanê ke ameyê kiştene Tibê Edlî yê Kehrîz ê Tehranî de yenê girewtene û nasnameyê înan nêameyo eşkerakerdene.
Merdimê kesanê ke beşdarê çalakîyan bîyê û birîndar bîyê, seba teşhîsî şonê morg
Eynê wextî de Komele raporê xo de dîyar kerd ke demê muracatanê keyeyan ê seba naskerdişê cenazayan û vînayîşê kesanê vîndîbîyayeyan de, efserê rejîmî keyeyan ra persenê ka gelo kesanê ke dinyaya xo bedelnaya, beşdarê çalakîyan bîyê yan nê, kesê ke beşdarê çalakîyan bîyê rasterast benê hewşê tibê edlî la seba yê bînan qereqolê polîsan ra mektubêk lazim o.
Prosesê naskerdişê cenazeyanê çalakîkeran hema nêqedîyayo
Komela Zanistî ya Wendekaranê Komelnasî da zanayene ke fotografê cinîyan ê monîtoranê merkezanê polîsan keyeyanê ke vîndîbîyayeyanê xo gêrenê, înan rê yenê erşawitene, hûmara dermî ya heme mergan xo de nêhewînena ke cenazeyanê nenas mojnenê ke prosesê naskerdiş û cipersayîşî hema nêqedîyayo.
Raporê bîlançoyê 43 rojan
Erjeno merdim vajo ke roja 28ê kanûna 2025î de rîyê krîzê aborî, sîyasî û komelkî ra Rojhelatê Kurdîstan û Îran de çalakîyê hîrayî destpêkerdê. Rixmê teda, tehdît û girewtiş û qetilkerdişanê rejîmê Îranî zî vengê nerazîbîyayîşan pêroyê welat û teberê welat de vila bi. Goreyê raporê Rêxistina Heqanê Merdiman HRANA’yî destpêkê çalakîyan ra Îran û Rojhelatê Kurdîstanî de 6 hezar û 961 kesî ameyê kiştene û 51 hezar û 591 çalakîkerî zî ameyê destbendkerdene, sewbîna 11 hezar û 22 çalakîkerî zî birîndar bîyê.
