Dayîkanê Aştî ê Stenbolî dîyar kerd ke bi waştişê azadîye ê do 28ê hezîrane de tewrê mîtîngî bibê û vat: “Aştî lazimîyêka sey nan û awe ya. Vengdayîşê ma şarê ma rê, wa bêrê ma waştişê xo bîyarê ziwan. Mîtîng do seba aştîya Serektî bêro viraştene.”
Bi pêşengîyê DEM Partî, DBP û TJA’yî do seba azadîya fîzîkî ya Rayberê Şarê Kurdî Abdullah Ocalanî 27ê hezîrane de Wan û Mêrsîn û 28ê hezîrane de zî Amed û Stenbolî de bi sloganê “Bi raybertîya azad ver bi azadîya” mîtîngî yenê viraştene. Stenbolî de mîtîng do Meydanê Bagcilarî de yeno viraştene. Hemserekê DEM Partî Tuncer Bakirhan û Verfekê DEM Partî Ayşegul Dogan sey qiseykerdoxî û Koma Agirê Jîyan û Tara Mamedova zî bi deyîranê xo tewrê mîtîngî benê.
Endamê Înîsîyatîfê Dayikanê Aştî ê Stenbolî Guler Bugday, Fatma Yilmaz û Cemîle Çiftçî derheqê “Mitîngê Azadîye” de qisey kerdê û vengdayîşê beşdarbîyayîşê kerd.
‘Wexto ke Serek azad nêbo do aştî zî nêvirazîyo’
Guler Bugday dîyar kerd ke bi serran o dayîkî, aştî wazenê û wina vat: “Ma zî şarê ma zî hetê şer de nîyê. Ganî heme dayîkî dest bidê yewbînan. Wa her kes vera şerî vindero. Seba ke şer rojeve ra vejîyo û seba waştişê azadîye ma do 28ê hezîrane de mîtîng virazenê. Aştîye lazimîyêka sey nan û awe ya. Birêz Abdullah Ocalan ne tena seba şarê kurdî, seba tirkan zî muhîm o. Ma xo û Serekê xo bawer ê. Her kes vano wa aştî bibo la dem derg beno. Wexta ke Serek azad nêbo do aştî zî nêvirazîyo. Serek azad nêbo do şarê kurdî her wext lingan ser o bo. Rolê dayîkan zî xeylî muhîm a. Vengdayîşê ma şarê ma rê, wa hezaran kes Meydanê Bagcilarî de kom bibê û waştişê xo bîyarê ziwan.”
‘Mîtîng do seba aştî û azadîya Serekî virazîyo’
Fatma Yilmaz vengdayîş seba tewrbîyayîşê mîtîngî kerd û nê çî vatê: “Ma veng danê şarê xo, çi kal û pîr, çi ciwan ganî her kes bêro Meydanê Bagcilarî. No mîtîng, mîtîngê aştî û serfirazîye yo. Ma do ser bikewê, wa Meydanê Bagcilarî pirr bibo ke her kes hêzê şarî kurdî bibo. Mîtîng do seba aştî û azadîya Serektî virazîyo. Aştî virazîyo do Serek zî azad bibo û do girewteyê ma zî bêrê veredayîş.”
‘Seba azadîya Serekî ganî her kes tewrê mîtîngî bibo’
Dayîka bi nameyê Cemîle Çîftçî zî ard vîrî ke 28ê hezîrane de “Mitîngê Azadîye” esto û wina vat: “Ma wazenê her kes tewrê mîtîngî bibo. Kurd, tirk û ereb ferq nêko, kam beno wa bibo ganî her kes tewrê mîtîngî bibo. Ganî aştî û azadîye virazîyo.”
