Endamê Meclîsê Dayîkanê Aştî yê Wanî ke tewrê eşkerayîya Roja Dayîkan bîyî, hêvî û waştişê xo îfade kerdê û vat: “Ewro seba ma rojêka pîroz a labelê zerrîya ma xemgîn a. Ma hêvî kenê ke na roje biba roja aşîtî, azadî û têduştîye.”
Meclîsê Dayîkanê Aştî 10ê Gulane Roja Dayîkan de, seba waştiş û pawitişanê xo yê seba prosesê Aşîtî û Komelê Demokratîkî ke 27ê Sibata 2025î de hetê Rayberê Şarê Kurdî Abdullah Ocalanî ra amebi destpêkerdene, xeylê şaristanan de vernîya hepisxaneyan de bi sloganê “Dîyarîya tewr pîl a seba dayîkan aştî ya” eşkerayî daye. Dayîkê Aştî yê ke Wan de tewrê eşkerayî bîyî, derheqê Roja Dayîkan de qisey kerd.
‘Rojêka pîroz a, labelê zerrîya ma xemgîn a’
Dayîka Aştî Kewê Işik Roja Dayîkan heme dayîkanê dinya pîroz kerd û waşt ke na roje biba wesîlaya aştî, azadî û têduştîye. Kewê Işik bale xo ant prosesê Aşîtî û Komelê Demokratîk ser o û wina vat: “Birêz Abdullah Ocalanî eşkerayî daye û ma heme şa bîyî. Ma va êdî aştî yena welatî, têduştîye virazîyena. Ewro seba ma rojêka pîroz a labelê çi heyf ke zerrîya ma xemgîn a. Her çî eşto serê milanê Rayberê Şarê Kurdî. Heta nika çi kewto serê milanê ey, ey ardo ca labelê dewleta tirkan hema gamî nêeştê. Statuyê birêz Abdullah Ocalanî qebul nêkenê. Ocalanî seba Aştî destê xo dergê heme însanan kerd. Aştî û têduştîye de zerar çin o, weşî est a.”
‘Ma veng danê dayîkanê tirkan zî’
Kewê Işik bale ant gamenêeştişê dewlete ser o û wina dewam kerd: “Ganî dewlete zî êdî game bierza, zerrîya dayîkan weş bikera. Ewro roja dayîkan a; werrekna ma heme dayîkan yewbînan verar bikerdêne, ma gedeyê xo verar bikerdêne. Labelê çi heyf ke zerrîya ma xemgîn a. Ti çîyêk nêkerdo, aştî verdaya kîştêk, eşta serê milanê birêz Abdullah Ocalanî û serê milanê şarê Kurdî. Ma veng danê dayîkanê tirkan zî; wa ê zî seba aştî wirzê we. Dem demê aştî yo.”
‘Ganî na roje biba roja aştî, azadî û aramîye’
Dayîka bi nameyê Kadrîye Gezîcî zî Roja Dayîkan dayîkanê fedakar ê Kurdistanî û heme dayîkan rê pîroz kerd û wina vat: “Ganî na roje biba roja aştî, azadî û aramîye. Eke aştî û azadî bêrê nê welatî, zerrîya dayîkan çend bi birîn ba zî, keyfê înan do weş bo. Ma wazenê ke heme girewteyê zîndanan bêrê veradayene.”
‘Ganî êdî aştî biba’
Dayîkanê Aştî ra Henîfe Kaçak zî Roja Dayîkan pîroz kerd; pawitiş û hêvîyê îfade kerdê û vat: “Ma hêvîdar ê ke na roje biba wesîlayê aştî, azadî, têduştîye, vindertişê gonî û wayûbiratîye. Besê Hozat 30 embazanê xo reyde çekê xo veşnayî û vat êdî no şer bes o, ma aştî wazenê. Rayber Apo vat êdî ma şer nêkenê, aştî ard dîwanî.”
