Dayîkê Aştîye yê ke sînorê Nisêbîn-Qamişlo de çalakîya nobete dewam kenê, dîyar kerdî ke semedê aştîye çi destê înan ra bêro do bikerê. Hemverê şerî de vengdayîşê yewîye kerd û wina vat, “Yê ke reyna ser bikewê, do Kurdî bibê.”
Çalakîya nobeta ke 13ê Kanûne ra qezaya Nisêbînî ya Mêrdînî de sînorê Qamişlo ser o hemverê hêrîşê Vakur û Rojhelatê Sûrîye ser o ameya destpêkerdiş, dewam kena. Çalakîya nobete ke bi paştdayîşê TJA, DBP û DEM Partî de destpêkerda, dewam kena. Cinîyê ke tewrê çalakî bîyî zî dîyar kerdî ke tena semedê aştîye nobete gênê.
Cinîyê ke bajarê Elîhî ra semedê paştî bidê nobeta sînorê Qamişloyî ameyî, derheqê hêrişê Vakur û Rojhelatê Sûrîye ser o JIN NEWS’î rê qisey kerd.
‘Ma do semedê aştîye canê xo feda bikerê’
Nuran Seçkîn ke Êlih ra tewrê nobete bîye, wina vat: “Nika Rojawan de way û birayê ma û gedeyê ma vernîya ma de yê. Keyeyê mi newe nêşîyo Rojawan. Ma uca de ameyê dinya û ma uca de pîl bîyî. Nika Rojawan de xeylêk merdimê mi est ê. Wa destê dayîkanê ke semedê aştîye derg benê, bigîrê. Aştî do semedê Kurd, Tirk û Ereban baş bibo. Şer û kiştiş çareserî nîyê. Eke ewro way û birayê şima uca de bibîyêne, şima do hêrişê înan bikerdêne? Her ca de gedeyê ma est ê. No şer do heta key wina dewam bikero? Ez sey dayîka aştîye vana, semedê aştîye çi destê mi ra bêro, ez do bikera. Ma zî semedê aştîye canê xo feda kenê. Gedeyê ma verê çimanê ma de yenê qetilkerdiş. Şima hende bêwijdan û bêmerhemet ê. Ez tîya ra veng dana pêroyê dinya; her kesê ke vano ‘ez merdim a’ wa destê xo bido wijdanê xo ser û fek şerî ra vera bido. Ez rojêke biciwîya zî ez do semedê çareserîye biciwîya.”
‘Ma waştişê aştîye ra fek vera nêdanê’
Dayîka Aştîye Maşallah Kaya zî qiseykerdişê xo de wina vat: “Ma Êlih ra semedê aştîye ameyî tîya. Ma nêwazenê neynûkê tu kesî bigino kerra ro û bidejo. Ganî cinî û gedeyî tu cayî de nêrê kiştiş. Ma tîya ra veng danê heme dewletan kenê ke ganî fek şerî ra vera bidê. Ma televîzyon de vînenî; cinî û gedeyî yenê kiştiş. Ma nêwazenê gonî bêra rijnayîş. Ma ewro ameyî ke aştîye pêro dinya misoger bikerê. Heta ke ma ganî bibê, ma fek waştişê xo yê aştîye ra vera nêdanê.”
‘Wa şarê ma bibo yew’
Edîbe Orpak zî vat, Rojawan bi têkoşîn ameyo xelasnayene û vat: “Seke yeno zanayîş şorişê Rojawan bi cinîyan ameyo kerdiş. Nê semedî ra ma hêvîya xo nêbirnenê. Heta ke ciwanê Kurdî bibê, şorişê Rojawanî nêqedîyeno. Kênaya mi di serrî verê uca de şehîd bîye, mi heta nika tirba aye zî nêdîya. Eke atmosferê aştî û aramî bibo, ma eşkenê tirbanê xo zî zîyaret bikerê. Zerrîya mi de hesreta kênaya mi menda. Ez nika kîşta aye de ya. Ez tîya de reyna îfade bikera; wa şarê ma bibo yew. Eke ma bibê yew, ma do ser bikewê. Biciwîyo şorişê Rojava! Yê ke ser bikewê do reyna Kurdî bibê. Wa her tim bi hêvî bibê. Ma zanê ke dorê ma de dişmen est o. Senî ke mîlçikî bi baskê xo bawer ê, ma zî eynî hewa bi ciwananê xo û hêzê xo bawer ê.”
