Dayîkê/Merdimê Şemeyî semedê perskerdişê çarenûsê xizmê xo yê ke destbendkerdişî de ameyî vînîkerdene, reya 1080ine Meydanê Galatasarayî de kom bî.
Çalakîya Dayîkê/Merdimê Şemeyî ke çarenûsê xizmê xo yê ke destbendkerdişî de ameyî vînîkerdene persenê û wazenê kerdoxî bêrê eşkerakerdene û muhakemekerdiş, hewteyê 1080ine de domnayî. Dayîkê Şemeyî Meydanê Galatasarayî de bi qerenfîl û fotografê kesê ke destbendkerdişî de ameyî vînîkerdene kom bî û semedê Huseyîn Taşkaya yo ke serra 1993ine qezaya Sêwregî ya Rihayî de ame destbendkerdiş û dimayê nê tu agahî ey ra nêame girewtiş, edalet waştî. Endama Heyetê Îdareyê Merkezî ya ÎHDyî Eren Keskin beyanatê çapemenîye wende.
Eren Keskin dîyar kerde ke vînîbîyayîşê bi zorî polîtîkayêka dewlete ya Tirkîya de û netîce de tu cipersayîşê bitesîr nêameyê kerdiş ke çarenûsê vînîbîyayeyan bêro eşkerakerdene û sucdarî bêrê cezakerdene. Eren Keskin dîyar kerd ke keyeyê vînîbîyayeyan bi polîtîkayêka sîstematîk ê înkar û bêcezakerdişî rî bi rî mendê û va dewlete bi nimitişê agahîyanê derheqê çarenûsê vînîbîyayeyan de îşkence înan ser o kena.
Eren Keskin dîyar kerde ke ê semedê perskerdişê çarenûsê Huseyîn Taşkaya kom bîyê û va: “Huseyîn Sêwreg de muxtar bi. Serranê 1990ine de Sêwreg binê kontrolê Eşîra Bucakan de bî û raporê fermî nê awanî sey “dewletêke mîyanê dewlete de” biname kerdbî. Huseyîn Taşkaya ke binpaykerdişê gird ê Sêwregî rexne kerdbî, bî hedefê hem hêzê asayîşî û hem zî Eşîra Bucakan. Semedê zêdebîyayîşê tehdîdan keyeyê xo şirawit Stenbol û demêk keyeyê apê xo de mend ke karûbarê xo rêz bikero. 6ê kanûne 1993ine de leşker, polîs û qorîcîyê Eşîra Bucakan bi karwanêko 30 makîneyan resayî keyeyê apê ey yê taxê Baglarî ya Sêwregî. Înan Huseyîn Taşkaya bi zor girewt û bi wesayîtê leşkerî berd. Na hedîse hetê merdim û cîrananê taxe ra ame dîyene. Keye, cendirme, polîs, dozgerîye û walîtîye tu cewab nêda keyeyî.”
Eren Keskin neql kerde ke selahîyetdarê leşkerî îddîa kerd ke Taşkaya dimayê destbendkerdişî polîsan rê ame teslîmkerdene û va la polîsan bi vatişê “O verê ma de nîyo; Sedat Bucakî ra persê” mesele xo ra dûr vistî. Eren Keskin va: “Parlamenterê DYPyî yê ê demî û serqorîcî Sedat Bucak o wext va, ‘Tîmê ma berd, labelê ma dewlete rê teslîm kerd; yê bînî çarçeweya malûmatê dewlete de yê.’ Labelê ê demî ra tu çî Huseyîn Taşkaya ra nêameyo eşnawitiş. Pêwa heme şahidan zî Serdozgerîya Komare ya Sêwregî hedîseye sey ‘îddîaya bêbingeh a keyeyî’ red kerde û dewaya bi qerarê nêtaqîbkerdişî girêda.”
Eren Keskin dîyar kerde ke ê do fek têkoşînê xo yê semedê edaletî û cezakerdişê kerdoxan vera nêdê.
Çalakî bi ronayîşê qerenfîlan yê Meydanê Galatasarayî peynî bî.
