Platformê Yewîya Cinîyanê Kurdan ra Çîgdem Kiliçgun Uçar kombîyayîşê çapemenîye de qisey kerd û va dinya deyndarê Rojava ya û sîstemo demokratîk do her kesî bixelesno.
Kombîyayîş de Uçar verê va: “Ez ravêr rojnamegeranê çapemenîya azad Nazim Daştan û Cîhan Bîlgin bi minet yad kena. Ma zanê ke raştîya Rojavayî, raştîya şarê ma erd de nêmanena. Mesele giran o, raştîya mesele naskerdişê Kurdan o, naskerdişê heqê Kurdan o.”
‘Di modelî estê’
Aye qiseykerdişê xo de dîyar kerd ke Sûrîye de di modelî est ê: “Rojava de şarê Kurdan, şarê Elewî, şarê Ereb, Durzî, Tirkmen kam est bo şorişêk viraşt. Nê şorişî de îdareyê xoser û sîstemo demokratîk vejîya. Ma nê sîstemê demokratîkî seveknenê. Modelê dîyin rejîmê otorîter û despot o. Rojava de çi sîstem virazo zî dewleta Tirk nêeşekena dekewa ci. Şarê Sûrîye yan zî hêzê Sûrîye wa sîstemê xo ronê.”
‘Yan xelesîyayîş yan vîndîbîyayîş’
Uçar peynî de va: “Ma vanê ke tena ma ney, tena şarê çar parçeyê Kurdîstanî ney, deynê dinya est o Rojavayî rê. Yan Rojava heme şaran xelesneno yan zî rejîmo otorîter ma vîndî keno. Ma tena Rojava ney, ma yew sîstemêk seveknenê, sîstemê demokratîk, sîstemê azadîye seveknenê. Ma vanê ke tena ma ney, tena şarê çar parçeyê Kurdîstanî ney, deynê dinya Rojavayî rê est o. Eke ma şorişê Rojavayî biseveknê ma do deynê xo bidê. Rojawan seba ma parçeyêk o. Ma wazenê bi fikrê xo bi paradîgmaya xo her ca de vila bibo. Cinî û şarê ucayî vano ke ma eşkenê îdareyê xo bikerê. Rojava wijdan dano ma. No wijdan ameyoxê azadîye yo. Dinya ser o ma kamcîn sîstemî ra biewnê tede zordarîye est a. Tena rojava ma dest de manena. Yan Rojava heme şaran xelesneno yan zî rejîmo otorîter ma xeletneno. Coka ma vanê ma tena Rojava ney ma sîstemêk seveknenê, sîstemê demokratîk, sîstemê azadîye.”
Tewr peyen Uçare dîyar kerd ke ê do tîya ra pey her ca de Rojavayî biseveknê û çalakîyanê xo seba Rojava bikerê.
