Grûba Xebatgeha Huneranê Sehnî ya Dîcle salona unîversîte de promîyerê kayê xo ya bi nameyê “Provaya Aştî” kerd û bale ante serê zehmetîyanê pêameyîşê aştî.
Grûba Xebatgeha Huneranê Sehnî ya Dîcle (DÎSSA) serra 2022 de Unîversîteya Dîcle de ameya ronayene û bi tîyatroyê kurdkî vejîyene vernîya wendekaran, vîzerî şande bi kayê “Aştî” yê ke nuştox Arîstophanes nuşta vejîya senhî ser û promîyerê kayê xo kerd. Kaye bi hetkarîya kaybazan hetê yew kaybazê kaye Kadîr Gur ra açarnayîşê kurdkî ameya kerdene. Kaye ke xeylê kesî tewrê temaşekerdişê bîyê salona tîyatroyî yê Rektorîya Unîversîte de ameye kaykerdene.
Kedkaranê DÎSSA’yî verê ke kayê bêro kaykerdene dîyar kerd ke waşto kayê xo Merkezê Kongre yê Unîversîte de kaybikerê la rayedaran destûr nedayo înan û dîyar kerd ke naye ser tewlî astengkerdişî qerar dayo na salone de kayê xo kaybikerê.
Beşdaran wexto ke kayê ameyene kaykerdene ge-ge huyayê ge-ge kêfweşîya xo bi piradayîşê çepikan mojna û xeylê kesan zî bi telefonan dîmen û fotografî antêne. Kaybazanê ke kayê “Aştî” yê Arîstophanes îlham girewta û kayê xo nameyê ey kerda “Provaya Aştîye” bale antê serê prosesê aştî yê ke est o, û zehmetîya ey. Kaybazan kayê xo aştî sey gedeyan mojna û naye ser bale ante serê zehmetîyanê caardişê aştî. Kaybazan sewbîna kayê de qalê problemanê bingeyin yê welat de qewimîyenê kerde û mesaj da ke serdestî nêverdenê aştî bi ca bêro û seba caardişê aştî bedêl yeno dayene.
Kay hetê beşdaran ra zaf ame ecibnayişî û kay bi pers û cewaban qedîya. Kay do siba û di sibayî eynî salone de saete 19.00 de bêro kaykerdene.
