Verfeka Karanê Teberan ê DYA’yî Matthew Millerî va ke ê seba ke têkoşînêko newe mîyanê Tirkîya û HSD’yî de nêvejîyo, her di hetan reyde têkilîye de yê. Miller va ke adirbestê ke dormeyê bajarê Minbicî yê Vakur û Rojhelatê Sûrîye de yo, heta peynîya nê hewteyî derg bîyo.
Verfeka Karanê Teberan ê DYA’yî kombîyayîşê rojaneyan de qisey kerd û va ‘Ma HSD û Tirkîya reyde rayîrêkê ameyoxî ser o qiseykerdişê xo dewam kenê.’
‘Menfeetanê xo menfeeatanê Sûrîye ser o metepişê’
Miller va ke DYA wazena adirbest heta ke mumkin o derg bibo û wina dewam kerd: ‘Ma nêwazenê ke qet yew het zî na rewşa bêîstîqrarî ra îstîfade bikero û seba menfeetanê xo yê tengan zerar bido menfeetê pêroyî yê Sûrîye.’
‘Vengdayîşê Hukmatê Neteweyî yo ke heme grûbê etnîkî tede yê’
Miller va ‘Ma wazenê ke hukmatêko neteweyî ke heme grûbê etnîkê Sûrîye tede yê, bêro viraştene.’ Ey va peynîyê prosesî de ganî tu mîlîsî nêmanê ke ‘binê alaya cîyayî de çekî girewtê’ û ganî şervanê xerîbî Sûrîye ra bêrê teberkerdene.
‘Şarê Sûrîye do qerar bido’
Persa derheqê sîstemê sîyasî yê neweyî yê Sûrîye de Millerî va ‘Nê qerarê DYA ney, şarê Sûrîye do bido.’ Ey va ke şarê Sûrîye ganî çarçewaya waştişê xo û komelê sivîlî de hukmat û qanûnê xo yê bingeyîn xo awan bikero.
