Cinîyê Êlihijî ke şîyî serdayîşê nobete, bale antî pêvînayîşê Rayberê PKK Abdullah Ocalanî ser o û vatî, ganî lezkî azadîya Abdullah Ocalanî pê bêro û peynîya hêrişan bîyarê.
MÊRDÎN – Cinîyê ke çalakîya nobete ya sînorê Qamişloyî zîyaret kerdî, nobete û pêvînayîşê Îmraliyî ercnayî û vatî: “Rojawanî ra tersenê, ayera hedef gênê. Hêzê cinî ra şorişê cinî ra tersenê. Hemverê nê hêrişan de ganî ma bibê yew û sere wedarnê. Eke aştî biameyîne waştiş do pêşnîyaz û metodê serekê ma ca biardêne. Hetêk ra pêvînayîş kenê, heto bîn ra şer kenê. Ganî serekê ma azad bibo. Rojawan zerrîya ma yo.”
‘Semedo ke şer peynî bibo ma xo ver danê’
Şukriye Îlçîn ya êlihije vat, semedê şer peynî bibo, beşdarê nobete bîya û vat: “Semedo ke ma kurd ê û semedo ke serekê ma azad bibo, ma tîya yê. Ma wazenê şer peynî bibo û aştî pê bêro. Dişminîyê ma kenê, wazenê kurdêk ça de bibo, bimiro. Serekê ma dir pêvînayîşêk pê ame. Ma wazenê ke o tewr lez wextî de azad bibo. Semedo ke şer peynî bibo, ma sînorî ser xo ver danê.”
‘Axa Rojava zêrîn e’
Halîme Îmîr zî dîyar kerd ke ê aştîye wazenê û nê semedî ra ameyê sînor û vat: “Tutî û sivîlî yenê qetilkerdiş. Nêheqîyêk pîl yeno kerdiş û şarê uca mecbûrê koçberî kenê. Ma şer nêwazenê, ma yewîye û pêgirewtişî wazenê. Çi derdê tutan est o? Ma aştî û yewîye wazenê. Herra Rojawanî zerd a. Coka nêwazenê kurdî uca de biciwîyê.”
‘Şorişê cinîyan ra tersenê’
Salîha Îmen zî vat, bi armancê paştdayîşê şarê Rojawanî ameyê tewrê çalakîya sînorî bîyê û wina vat: “Ma semedê aştîye Êlih ra ameyî tîya. Vakur, Başûr, Rojawan û Rojhelat de ma pêro yew ê. Zerrîya ma pîya dejena. Çiqas hewl bidê ma parçe bikerê zî ma yew ê. Her çiqas ma bîyê çar perçe zî zerrîya ma yew perçe ya. Zerrîya ma pîya ya. Ganî ma pêro bibê yew û hemverê nê hêrişan de wurzê lingan ser. Ganî ma çalakî û rayîrşîyayîşê cîya organîze bikerê. Semedo ke Rojava ra tersenê, kenê hedef. Hêzê cinî û şorişê cinî ra tersenê. Rojawan zerrîya ma yo. Nê semedî ra ganî ma wurzê lingan ser.”
