Festîvala Filmanê Kurdkî ya Dusseldorfî ya 3. ke emser bi sloganê “Yewîye û xoverdayîş” yena organîzekerdene, ewro dest pêkena. Festîvala de ke vîrê dîyayîşkî yê çar parçeyanê Kurdîstanî ana serê perdeyî, filmanê cîya-cîya do bêrê mojnayîş. Sînemakar Metîn Ewr vat ke emser babetanê xoverdayene û yewîye û seba her çar perçeyê Kurdîstanî do filmêk bêro xelatkerdene.
Metîn Ewr ke bi serran o bi kemeraya xo pey heqîqatê komelê kurdî û dejanê koçberîye de yo, emser Dusseldorf de filmanê ciwanan û eseranê neweyan erjneno. O beno mêmanê Festîvala Fîlmanê Kurdkî ya Dusseldorfî ya 3. Ewrî, sînemaya xo de her wext giranîya xo daya hîkayeyan ser o ke binê xirbeyan ra vejîyayê û o bi ziwanêko modern xover dano.
Metîn Ewr, derheqê rewşa sinemaya Kurdkî ya ewroyîne de, tesîrê kêmîmkanîya afirnayoxî û ruhê “xoverdayîşî” yê mîyanê filmanê emserî ser o ajansê ma rê qisey kerd. Metîn Ewrî derheqê sînemaya ke bi îmkananê kêmî la bi vîzyoneko gird yena awankerdişî de erjnayîşê xeylê muhîmî kerd.
‘Festîvale komel û kulturî ana têhet’
Metîn Ewrî bale ante fonksîyonê festîvalan ser o û dîyar kerd ke na festîvale de dej, verkewtiş û kêfweşîya komelanê cîyayan yena parekerdiş. Ewrî wina dewam kerd: “Festîvale, komel û kulturanê cîyayan ana têhet. Hîkayeyanê cîyayan ana têhet. Bi beşdarbîyayîşê sînemakaran û fîlman komelî yewbînan û kulturanê yewbînan nas kenê, mabenê komelan de têkilîyêk virazêna. Bi taybetî dîyaspora de, na festîvale seba naskerdişê netewe, kultur û hunerê Kurdkî sey berêko muhîm a.”
Çar perçeyan ra 29 filmî: Enfale ra heta problemanê cinîyan
Metîn Ewrî derheqê festîvale de agahîyê teknîkî dayê û dîyar kerd ke emser 29 filmî, 3 hebî metrajdergî, 9 heb belgefilm û 17 hebî filmî kilmî programê festîvale de ca gênê. Ewrî ard ziwan ke musabeqa tena beşanê filmanê kilman de est a û wina dewam kerd: “Çar parçeyê Kurdîstanî ra filmî kilmî ameyê. Babetê cîya-cîyayî est ê; anîmasyon, babetê qirkerdene, qirkerdişê Enfalî û problemê cinîyan. Nê babetê cîya-cîyayî manayêka bîne vejenê orte.”
Hunerî ser o tesîrî şerî: Rojava û Rojhelat
Metîn Ewrî vat ke sloganê emserî yê Festîvale “Yewîye û xoverdayîş” o. Metîn Ewrî dîyar kerd ke rewşa şerî ya Rojhelatê Mîyanenî tesîrêko negatîf berardişê hunerî ser o kena. Ewrî bale ante kêmbîyayîşê filmanê Rojava û Rojhelatî ser o û wina vat: “Rojava serrêk ra zafêr o ke mîyanê şerî de ya, coka îmkanê eserdarîye kêm bîyî. Rojhelat de zî rîyê şer û visîyayîşê înternetî ra, muracatî zehmet bîyî. La reyna zî vera nê bêîmkanîyan zî tayî rejîsoran filmê xo resnayê festîvale, no seba ma kêfweşîyêk a. Nê fîlmî bi xo nîşaneyê xoverdayîşê hunerî yê.”
4 parçe 4 xelatî
Metîn Ewrî derheqê xelatan de zî agahîyî dayê ke seba filmanê kilman 4 xelatî tewr muhîmî ameyê hedrekerdene û vat: “Seba her çar parçeyanê Kurdîstanî filmêk do bêro xelatkerdene. Sewbîna 4 xelatê rûmetê zî est ê ke festîvale bi xo dîyar kena.”
‘Warê ma tena festîval ê’
Metîn Ewrî bal ant astengîyanê ke vernîya sînemaya Kurdkî de yê ser o û vat: “Her çar parçeyan û dîyaspora de fîlmantiş û mojnayîşî de astengî zaf ê. Tena warêk maneno seba mojnayîşê filman, o zî festîval ê. Festîvale, berêko muhîm ê seba ke sînemakar derdê xo biresnê dinya.”
