Kaykerdoxe Şîlane Alagoz pare kerd ke Festîvala Tîyatroyî ya Amedî pirkulturkî ya û vat: ‘’Na festîvale hinî bîya vîrêko kulturkî. Ma emser hîna bi xurtî do sehne de bibê.’’
Festîvala Tîyatroyî ya Amedî ya 10ine bi şîarê ‘’Çiraya ma geş dibe’’ 25ê nîsane de do dest pêbikera. Çarçewa festîvale de 11 kayî do bêrê kaykerdene le nînan ra 6ê ci bi kurdkî, 4ê ci bi tirkî û 1 zî armenkî ya. Festîvale do heta 4ê gulane dewam bikera. Akerdişê festîvale de Bavê Teyaro ke xoverdayîşê Awbendê Tişrînî de şehîd bibi do bêro yadkerdene.
Kaykerdoxe Şîlane Alagoz derheqê festîvale de ajansê ma rê qisey kerd û ard ziwan ke na festîvale 10 serrî ya dewam kena.
Şîlane vat: ‘’Na festîvale hinî bîya vîrêko kulturkî. Par zî rixmê astengîyan zî ma festîvala xo kerdibî. Emser ma do hîna bi xurtî sehne bigêrê. Festîvale de kayê ma ‘Romeo û Juliet’ zî do reya verêne bêro kaykerdene.
Emser şarê ma ‘tîyatroyê pirziwanî’ seyr bikero. Ma do festîvalêka pirziwanî û pirkulturkî bikerê. Coka festîvala ma do hîra biba. Amed do bi tîyatroyî mird biba. Ma venga pêro şarê xo danê ke wa bêro kayanê ma seyr bikero. Ma pîya nê kulturî vila bikerê.’’
