Sîyasetmedar, akademîsyen û huqûqnasan ke derheqê pêvînayîşê Abdullah Ocalanî de qisey kerd, vat ganî tecrîd bêro wedaritene ke Abdullah Ocalan şertanê azadan de prosesî îdare biko.
Badê pêvînayîşê Apoyî yê bi wekîlanê DEM Partî Pervîn Buldan û Sirri Sureyya Onderî, sîyasetmedar Zîya Pîr û Nursel Aydogan û akedemîsyen Çetîn Gurer û huqûqnase Rengin Ergul ajansê ANF’yî rê qisey kerd.
Zîya Pîrî bale ante muhîmîya vatişanê Apoyî ser û nê vatî: “Eke dewlete û hukmat paştdayîşê paradîgmaya newî ra peyser game meerzê do demo newe dest pêbikero. Ma nêzanê ke prosesê wînayênî spekulasyon, manîpulasyon û şantajan rê akerde yê. Coka ganî muxatabî bi heyetan nê bi xo rî bi rî pêvînayîş bikerî. Senî ke Birêz Erdogan û Bahçelî fîkranê xo şarî vanê ganî wina Ocalanî rê zî vajî.”
Çetin Gurer ard ziwan ke no pêvînayîş do verê sîyasetî akero û nê vatî: “Badê 9 serrran warê sîyasetî de Ocalanî reyde pêvînayîş ame kerdene. Netîceyê pêvînayîşî cade şarî ser o tesîr kerd. Mesajanê Ocalanî warê sîyasetî biney kerd rehet. Reyna qala meseleyê Kurdan, haştîye û çareserî ame kerdene. No çîyo zaf muhîm û erjîyaye yo. Ganî tecrîd bi temamî bêro wedaritene. Îqtîdar çend qala çareserîye bikero zî heta ke tecrîd nêro wedaritene û perspektîfê çareserîye yê Abdullah Ocalanî nêrê zanayene qiymetê nê eşkerayîyan çîn o.”
Nursele Aydogan zîyaretê DEM Partî yê Îmraliyî zaf muhîm sey çîyo tarîxî hesibna nû wina vat: “Badê 9 serran heyetê DEM Partî pêvînayîşo verên kerd. Ocalanî bi vervînayîşanê xo yê xurtan û heme nîyetê xo yê holî çîyê ke ganî bêrê kerdene vatî. Perspektîfê ci hêvî danê. Ma zî vanê ke ‘hêvî serkewtişî ra hîna erjîyaye ya’ û wayîrê nê perspektîfan vejîyenê.”
Rengine Ergul zî bale ante serê tecrîdî ser û nê vatî: “Ganî huqûqnasî vera tecrîdî hîna aktîf têkoşîn bikerê. Pêvînayîş gama muhîm a la tecrîd hema dewam keno. Seba ke tecrîd bêro wedaritene, Ocalan bibo azad û tepişteyê sîyasîyî bêrê verdayene ganî pawitişo huqûqî bêro xurtkerdene. Reyna sûcê merdimîye ke Rojawan de yenê kerdene ganî ê zî bêrê belgekerdene û têkoşîno huqûqî bêro dayene. Huqûqnasî parçeyêkê mîsyonî yê. Nê prosesî de wezîfeyê ma no yo.”
