Mamosteyê kurdkî dîyar kerdî ke ziwanê dayîke sey heqê perwerdeyî naskerdiş û statuyê semedê kurdkî semedê aştîye zî do gamêke samîmî bo û va: “Eke meseleya kurdî çareser bibo ganî vernê de kurdkî bêro qebûlkerdiş. Eke na babete çareser nêbo do proses zî samîmî nêro vînayîş.”
Yew sebebê esas yê meseleya kurdkî qedexekerdişê ziwanê dayîke yo û sey ‘ziwan nîno naskerdiş’ yeno pênasekerdiş. Serra perwerdeyê newe yê 2025-26ine dest pêkerd. Amed de 8ê êlule de şaxa Egîtîm Senî ya Amedî û MED-DER, Komeleya Cigêrayîşê Zanistê Komelê Kurdî verê Midûriyê Perwerde yê Neteweyî de eşkerayîyêke dayî. Welatijan pankartê, “Em perwerdehiya bi Kurdî dixwazin/ Ma perwerdeyê bi Kurdkî wazenê” , “Perwerdeya bi zimanê zikmakî mafê hemû gelan e” û dowîzê, “Ma perwerdeyê bi Kurdkî wazenê”, “Bila Kurdî bibe xwedî statu”, “Wa Kurdkî bibo wayîrê statuyî” zî berz kerdî.
Mamosteyê ziwanê kurdkî Berîvan Duman û Dîlan Guvenç derheqê waştişê perwerdeyê bi ziwanê dayîke û girîngîyê statuyê ziwanî de qisey kerdî.
‘Ziwanê dayîke xeta ma ya sûr a’
Berîvan Duman dîyar kerd ke semedê aştîye yew gamê esasî yê ganî bêro eştiş qebûlkerdişê statuya kurdkî yo û va: “Ma kurd ê, ziwanê ma kurdî yo. Sey her welatijî ma zî wazenê bi ziwanê xo qisey bikerê. Almanya de dibistanêk ziwanê kurdkî abî. Tîya bi mîlyonan kurdî est ê la ma nêeşkenê bi ziwanê xo perwerde bivînê. Ziwanê ma semedê ma xeta sûr a. Eke aştîyêk pê bêro, ganî ma ewilî ziwanê xo bi azad bişuxilênê. Ma wazenê no zulm peynî bo.”
Ziwanê perwerdeyî
Dîlan Guvenç zî derheqê armancê çalakîya pê ardê de qisey kerd û va: “Her tut ganî bi ziwanê xo perwerde bivîno. La Tirkîya bi serran o no yeno astengkerdiş. Semedê qanûnê bîyaye de kurdkî sey ziwanê perwerde nîna şuxilnayîş. Heqê ma zî est o ke ma bi ziwanê xo perwerde bivînê. Ma bi nê armancî tîya yê. Ma wazenê ziwanê ma bibo ziwanê perwerdeyî. Her netew bi ziwanê xo est o. Bi ziwanê dayîke perwerde çinbo o ziwan çin beno. Derheqê prosesî de komîsyon ame awankerdiş. Eke problem bêro çareserkerdiş ganî ewilî kurdkî bêro qebûlkerdiş. Nêro qebûlkerdiş no proses zî raştî nêmojneno ra. Semedê nê ganî gamê semedê heqê ziwanê dayîke bêrê eştiş.”
