Hewldana ji bo Roboskî Edalet, aşma 172. a seba kesanê ke Qirkerdişê Roboskî de cuya xo ra bîyê, eşkerayî daye. Eşkerayî de ameye dîyarkerdene ke berpirsîyarê Qirkerdişê Roboskî dîyar ê û ame waştene ke kiştoxê qirkerdişî bêrê muhakemekerdene.
Hewldana ji bo Roboskî Edalet, bi wesîlayê aşma 172. ya Qirkerdişê Roboskî, Cehdeyê Sakarya yê qezaya Çankaya ya Anqara de eşkerayî daye. Endam û temsîlkarê dezgehanê sîvîlan, rayberîya DEM Partî ya Anqara, endam û rayberê ÎHD’yî beşdarê eşkerayî bîyî. Eşkerayî de pankarto ke ser o “Wa kiştoxî bêrê vînayene, Roboskî reyna teqez nêqewimîyo” nuştebi, ame girewtene. Metnê eşkerayî hetê rayberê Şubeyê ÎHD’yî yê Anqara Atîlla Dîrîmî ra ameye wendene.
‘Berpirsîyarê qirkerdişî dîyar ê’
Atîlla Dîrîmî dîyar kerd ke 14 serrî û 172 aşmî derbaz bîyî, labelê hema zî berpirsîyarê Qirekrdişê Roboskî nêameyê muhakemekerdene û wina vat: “Şewa 28ê Kanûna 2011î de Roboskî de qirkerdişêko pîl qewimîya. Ame vatene ke ‘xeletî’ bîya, labelê na şewe 19ê ci gedeyî, 34 merdimê ma hetê dewlete ra ameyî qetilkerdene. Nê kîştoxî û no qirkerdiş hetê sazgehanê dewlete ra ame nimitiş. Raştîye bi hewayêko sîstematîk ameye tarîkerdene. Nê welatî de bêcezaverdayîş rewşêka awarte nîya; na rewşe êdî bîya rewşêka rêzine. Nê semedî ra na rewşe tarzê rayraberdişê dewlete ya.”
‘Sazgehê dewlete kiştoxan pawenê’
Atîlla Dîrîmî persê “Faîlê Roboskî kamca de yê?” kerd û wina qisey kerd: “Dewaya Gulîstan Doku de zî na raştîye reyna zelale bîye; çîyo ke yeno kerdene cipersayîş nîyo, sazgehê dewlete kiştoxan pawenê. 1100 hewte yo ke Dayîkê Şemî vîndîbîyayenanê xo persenê. Her çiqas nê qewimîyayîşî sey ‘faîlê nedîyar’ bêrê pênasekerdene zî, rastîye de faîlî dîyar ê. Roboskî nê welatê ‘huqûq û edaletî’ de qewimîya. Huqûq û edalet seba kamî est ê û seba kamî çin ê, dîyar beno. Her çend heqîet bêro ereyvistene zî do her tim vîrê komelî de bêro pawitene. Ma Roboskî xo vîr ra nêkenê.”
‘Roboskî qeza nîya’
Atîlla Dîrîmî da zanayene ke faîlî yenê pawitiş û wina vat: “Wezaretê Edaletî eke wazeno faîlê hedîseyanê nedîyaran muhakeme bikero, wa verê derûdorê xo ra biewnîyo. Ma reyna vanê ke Roboskî qeza nîya; no dewamê bêcezaverdayîş û qirkerdişanê bînan o. Ma do vera neheqîyan pîya têkoşîn bikerê û her 28ê aşme de persa kîştoxanê Roboskî bikerê.”
