Girewteyo sîyasî Metîn Uyar ke Hepisxaneyê Ewleyîya Berze ya Kirşehîrî de girewteyo, bi mektubêk piştîya xo ya seba Rayberê Şarê Kurd Abdullah Ocalanî ard ziwan. Metîn Uyar waşt verê ke ma bikewê rehawetî ganî ma têkoşînî xurt bikerê.
Vengdayîşê Rayberê Şarê Kurd Abdullah Ocalanî Kurdîstan de pozîtîf ame pêşwazîkerdene. Reyna Ewropa û welatanê dinya zî piştîyêka xurte daye. Partî û rêxistinê kurdan zî vengdayîşî sey manîfestoyo seserrî pênase kerd û piştîya xo ard ziwan. Girewteyê sîyasî zî piştî da vengdayîşê Rayberê Şarê Kurd Abdullah Ocalanî. Girewteyanê sîyasî ra ke piştîya xo ard ziwan Metîn Uyar o ke 11 serrî yo girewte yo. Metîn Uyar Hepisxaneyê Ewleyîya Berze ya Kirşehîrî de maneno. Metîn Uyar derheqê mesajê Rayberê Şarê Kurd Abdullah Ocalanî de bi rayîrê keyeyê xo mesajê piştîdayîşê pare kerd.
Mesajê Metîn Uyar wina yo.
Ma serdemêko muhîm, krîtîk û hende zî tarixî ra vîyarenê û ciwîyenê. Keda ke ma danê; parçeyekê huşk yê darî ra bedilîya dara Çinarê ke do qet û qet huşk nêba. Zaf gonî rijaye. Zaf dejî ameyê antene. No dej qêm nêkerd, ser de bi posta û kargoyan cenazeyê dekerdê virarê dayîkan.
Modernîteya Kapîtalîst û Emperyalîst bi rayîrê fînansê kapîtal pereyî pereyan ser o vêş kerdê. Seba ke hîna zaf gonî birişno û asîmîlasyonî aver bero, şero ke kurd û tirkan yewbînan rê dano qirkerdene, sey rejîmê şantajî sûr kerd. Termê aştî termê sûc û qedexe eşt teber.
Tarixî sîyasî yê dinya de têkoşînê ma mohrê xo estbîyayîş û pawitişî nasnameyî dayo. Reyna tarixê sîyasî yê dinya de têkoşînê ma bi vengdayîşê tarixî yê Îmraliyî mohrê xo dayo sîyasetî. Ez sey neferekê nê hereketî, ez tewrê heme vengdayîşê tarixî bena û seba ke no vengdayîş bi serkewte bireso netîce, seba ke rayîrê aştîyêka bi rûmete abiba, çi bikewo milê mi ser o, ez amade ya ke bikera.
Verê ke ma keyf bikerê û bikewê rehawetî, ganî ma hîna zaf têkoşîn û xoverdayîşê xo xurt bikerê. Verê ke ma bikewê hisê binkewtiş, binfînayîş û hisê ‘qedîyayîşî’, ma seba rojbîyayîşêko newe ke aver şêro, xover bidê.
Aştîya komelan û şaran û problemê komelan çiray bi zîhnîyetê kapîtalîst û bazirganîye çareser nêbenê. Na munaqaşa û fikir, fikranê xoserî ra dûrî yê. Bi taybetî nê fikir û ewnîyayîşî neheqîyêka girde kesanê sey ma girewteyan rê yena kerdene.
Rewşa terimê azadîye bi rewşa meridm a zindanî de û teberî ra girêdaye nîyo. Merdim nêeşkeno azadîye goreyê rewşa zindan û teberî şîrove bikero. Azadîye cuyêka bi rûmete ra girêdaye ya. Bi naskerdişê heqîqetî mumkin o.
Heqîqet azadkerdişê girewteyanê hepisxaneyan nîyo. Merdimo Zanaye vano “Heqîqet eşq o. Eşq cuyêka azad o.” Seba eşqê xo yê azadîye ma ameyê girewtene. Seba ke eşqê ma cuyêka azad a ma ameyê girewtene. No zî bi fehmkerdişê yewbînan û maneyî mumkin o. Ya tewr muhîme zî bi fehmkerdişê Merdimê Zana azadî resena serkewtişî. Seba Ke kongre biresa netîce, ganî ma fedakarî bikerê.”
