Bi munasebetê Roşanê Qurbanî gorê Vedat Aydinî ame zîyaret kerdene.
Pêşêngîya MEBYA-DER’î ya Amedî de bi munasebetê Roşanê Qurbanî mezelê Vedat Aydin ê wexto ke Serekîya Partîya Kede ya Şarî (HEP) ya Şaristanê Amedî kerdêne, 5ê temuze 1991 de keyeyê xo ra amebî girewtene û dima ra zî ame qetilkerdene. Zîyaretê Mezelî yê Berê Merdînî de sîyasetmedar, hemserekê partîyanê sîyasî, temsîlkarê sazgehanê sivîl û keyeyê Vedat Aydinî tewrê zîyaretî bîyî.
Hemcuya Vedat Aydinî, Şukran Aydin qiseykerdişe xo de şexsê Vedat Aydinî de roşanê heme Kurdîstanî pîroz kerd û vat: “Ma mînetdarê înan ê, ma do seba înan têkoşînê xo bidê. Ma vengdayîşê Wezaretê Edaletî kenê. Vatêne ke ma do dosyayê faîlî înan ne dîyarê abikerê. Eke dosyayî berê akerdene, wa heme dosyayê serranê 80î û 91î ra bigîrê heta roja ewro ke ameyê girewtene wa bêrê akerdene û ma qetilkaran nas bikerê.”
‘Rayraberdişê têkoşînê Vedat Aydinî rûmet o’
Hemserekê DEM Partî yê Amedî Abbas Şahînî zî bale ante serê Prosesê Aştî û Komelê Demokratîk û wina vat: “Rayraberdişê têkoşînê Vedat Aydinî rûmet o. Ma do vîrardişê hevalanê ke pêşengî kerda bidomnê, seba caardişê aştî, demokrasî û edaletî hewceyî bi qebulkerdene est a. Ez reyna Vedat Aydin ê ezîz û yê ke nê têkoşînî de cuya xo ra bîyê vîr ana.”
Zîyaretê goristanî bi ronayîşê qerenfîlan qedîya.
