Heqê hêvî sey name rapor de ca nêgirewt la çarçeweya qerarê AÎHM’î de ca girewt. Eynî wextî de ame dîyarkerdene ke seba endamanê PKK’yî zî qanûnê taybetî do bêrê viraştene.
Komîsyonê Meclîsî kombîyayîşê xo yê peyên ê 21. viraşt. Raporo hempar ke 60 rîpel û 7 babetan ra yeno pê, kombîyayîşî de ame munaqeşakerdene. Seba vîyartişê raporî ganî 51 endamanê komîsyonî ra 31î vengê xo bidê.
Telîmatnameyê qanûnî seba endamanê PKK’yî
Raporî de xofeshkerdişê PKK’yî sey qonaxa tewr muhîme ya prosesî ame mojnayene. Ame dîyarkerdene ke ganî fesihkerdiş hetê kesan ra ke dewlete wezîfedar kerdî, bêro tesbîtkerdene. Çekverdayîş sey destpêkerdişê çarçeweya qanûnî û sîyasîye ame pênasekerdene. Rapor vano ke ganî mekanîzmayêka çimdarî û raporkerdişê beşê îdareyî de bêro ronayene ke averşîyayîşo pêt ê prosesî temîn bikero. Fesihkerdîş û çekveradayîşê PKK’yî de telîmatnameyê qanûnî lazim ê û na mesela ser o pêameyîşo pêroyî est o.
Qanûnê taybetî
Rapor seba entegrasyonê PKK’yî cuya komelkî de çarçeweya qanûnî ya taybet pêşnîyaz keno û vano ke ganî pêkewtiş bi pêroyî bireso bingeyêkê qanûnî û sîyasî ke domdarîye temîn bikero. Seba xurtkerdişê entegrasyonê komelkî telîmatnameyê qanûnê taybetî, xoser û demkî lazim ê. Yeno pêşnîyazkerdene ke qanûno xoser ke prosesê bêçekbîyayîşî reyde bêro çareserkerdene, bes hîra bo ke netîceyanê prosesî bi pêroyî wedarê û zemînê sîyasetê demokratîkî xurt bikero.
Heqê hêvî
Heqê hêvîy sey name rapor de ca nêgirewt. La seba kesanê ke cezaya muebetî girewta çarçeweya qerarê AÎHM’î de do sererastkerdişêk bibo, bi no hawa rapor de ca girewt.
Kerdişê qeyûman
Kerdişê qeyûman zî rapor de ca girewt. Goreyê raporê hemparî êdî wexto ke hemşaredarêk wezîfe ra bêro dûrvistene, cayê ey de qeyûm nêyeno tayînkerdene û meclîsê şaredarîye do mîyanê xo de yewî/yewe wezîfedar bikero.
