Serekê CHP’yî Ozgur Ozelî badê vengdayîşê Abdullah Ocalanî proses erjna: “Heta ke kurd, tirk û rayberê hereman zîndan de bê, tayînkerdişê qeyûman dewam bikerê, nê welatî de çareserîyêk mumkin nîya.”
Serekê CHP’yî yê Pêroyî Ozgur Ozelî kombîyayîşê grûbe yê partîya xo de qisey kerd. Ozelî ke vernîya 8ê Adare de bale ant kiştişê cinîyan ser o ke zêde benê, dîyar kerd ke ê do Peymana Îstanbulî reyna bikerê hukmî û vengda cinîyan “Wa no tarîxî de sey not bimano. Heta ke na grûbe Peymana Îstanbulî reyna bîyaro hukmî, xoverdayîşê şima xoverdayîşê ma yo.”
Seba çareserî meclîs nîşan da
Ozelî ke badê vengdayîşê ke Rayberê Şarê Abdullah Ocalanî kerdbî, derheqê prosesî de beyanat zî da, seba çareserîya meseleyê kurdî reyna Meclîs nîşan da û va: “Eke problemêko winasîn do bêro çareserkerdene, bi demokratîkbîyayîş binê banê Meclîsî de do bêro çareserkerdene. Heta ke rojnamegerî, girewteyê Gezîyî, kurd, tirk, rayberê herêman zîndan de bê, tayînkerdişê qeyûman dewam bikero, nê welatî de çareserîyêk mumkin nêbena. Serekê Meclîsî Numan Kurtulmuş ganî hîna zaf berpirsîyarî bigîro. Ma nêkewtê mîyanê bazarî û ma do nêkewê zî.”
Qiseykerdişê Ozgur Ozelî wina yo:
“Tirkîya de problemo tewr muhîm o yo ke şîdeto ke cinîyan ser o yo, nêvindeno. Serra 2024 ma bi 445 kiştoxan cinîyan qedêna. Nê 2 aşmanê 2025î de hûmare êdî resaya 64. Çimeyê şîdetî ke cinî marûz manenê, sistem bi xo yo. Na welate de çi ke beno, dîyar o ke seba weşîya cinîyan nêbena. Ma nê babetan ser o derg û dila qisey kerd. Wa no tarîxî de sey not bimano, heta ke na grûbe Peymana Stenbolî reyna bîyaro hukmî, xoverdayîşê şima xoverdayîşê ma yo.
‘Zerrîya ma hema zî seba Madimakî veşena’
Heto bîn ra ma va zerrîya ma seba Madimakî veşena. 32 serrî yo zerrîya ma veşena. La çi heyf ke muameleyo ke êyê ke 35 canê ma veşnayî û kiştî, înan wijdanan çizneno. Ê yê ke qerarê Mehkemeya Qanûnê Bingeyînî yê derheqê Can Atalay, Selahattîn Demîrtaş, Osman Kavala de dayî, tetbîq nêkenê, qararo ke Mehkemeya Qanûnê Bingeyînî seba derheqê qatilanê Sêwasî ‘eşkenê heqê xo yê başî ra îstîfade bikê, endamê rêxistina terorî nîyê’ de dayo, rastîye de no suco ke vera însanîyetî yo eslê xo de vîyartişê wextî ra nêbeno ke feyde bivînê la înan ci ra îstîfade kerd. Bi şuxilnayîşê yew qararê AYM’yî na aşma sibate de 29 kiştoxan ra 23ê înan ame veradayene. Yeno pawitene ke 6 sucdarê bînî zî rojê ameyoxan de bêrê veradayene. Û Erdogan wexto ke no qerar ame girewtene vatbi ‘Wa seba şarê ma xêyrên bo.’ Rêzdar Erdogan sey her wextî, terefê xo weçîna. O wext ma zî terefê xo eşkera bikê.”
“Ma proseso ke hetê rêzdar Bahçelî ra bi girewtişê destê grûba DEM’î dest pêkerdo, bi dîqet û zanayîşê berpirsîyarîya xo taqîb kenê. Wexto ke CHP DEM Partî reyde qisey kerd, ê terorîst îlan kerdê. La wexto ke tayînkerdişê qeyûmî rê îtîraz kerd, rexne seba ci ameyê. Wexto ke yew serekê şaredarîya CHP’yî seba tazîye telefon kerd, sey endamê rêxistina terorî ame qebulkerdene û ey kerd zindan. Nika ke verê heyetî abîyayo, ozrêk zî CHP’yî rê nêwazenê. Ma vanê no problem binê banê Meclîsî de yeno çareserkedene. Ma îfade kenê ke ganî bi gamanê demokratîkbîyayîş, viraştişê qanûnan wa bêro çareserkerdene. Ma bi hewayêko zelal vanê ke ganî bi zerrîpakîyêka pêroyî, zelalî û mutabakato komelkî dewam bikero. Eke problemêko winasîn do bêro çareserkerdene, bi demokratîkbîyayîş binê banê Meclîsî de do bêro çareserkerdene.”
